Pesalemo 51 - Tosi Tapu

Pesalemo o le fakasemala

¹ Ki le pule o le kau sua. Pesalemo a Tavite.

² I le au o le polofeta ko Natane kia Tavite, i le oki o lana ano kia Pate-Sepa.

³ Ei Atua ! Alofa mai kiate au i lou agamalie ; Soloi aku agasala o mulimuli ki lou manava alofa lasi ;

⁴ Ke ke fufulu katoa au i laku agaveli, Ti ke ke fakamea au i laku agasala.

⁵ Talie e kau iloa aku sala : Ti e tuu mau laku agasala i oku mua.

⁶ Na kau agasala kiate koe toka tasi, Ti na kau fai le nea leia e veli ki ou mata ; Koia e ke faitotonu ai loa i lau fakatuutuu, ti e ke maokioki ai loa i lau fakamaau.

⁷ Ko leinei, na kau tupu i le agaveli, Ti na fanaui au e loku tinana i le agasala.

⁸ Kae e ke loto ke nofo le maoki i le takele o le loto : Koia ke ke fakaulu le poto ki loku loto !

⁹ Ke ke fakamea au ki le isopa, ti e kau mea loa ; Ke ke fufulu au, ti e kau tea loa o lasi ake i le nive.

¹⁰ Ke ke fakasa mai kiate au le nekenekea mo le fiafia, Ti e fiafia loa a ivi ala na ke fatifatii.

¹¹ Ke ke Tagaki kese ou mata i aku agasala, Ke ke soloi aku agaveli fuli.

¹² Ei Atua ! Fakatupu iate au se loto mea, Fakafoou iate au se loto malie.

¹³ Aua na ke tiaki au o mamao i ou mata, Aua na ke too iate au lou Laumalie maokioki.

¹⁴ Toe tuku mai kiate au le fiafia o lou fakamauli, Ti ke poupou au e se loto malie !

¹⁵ E kau ako loa ou ala kia latou ala e maumaui ia latou, Ti e toe au loa le kau agasala kiate koe.

¹⁶ Ei Atua, ko le Atua o loku fakamauli, ke ke saofaki au i le toto na liligi, Ti e fakafetai loa loku alelo ki lou manava alofa.

¹⁷ Aliki, fakamavaa oku laugutu, Ti e fakasa loa e loku gutu lou fakavikiviki.

¹⁸ Ka na ke loto ki ni sakilifisio, na kau momoli atu loa latou kiate koe ; Kae e leaise ke fiafia i ni failaulau.

¹⁹ Ko sakilifisio ala e malie ki le Atua, ko se loto fatifatii : Ei Atua ! e leaise ke tiaki se loto fatifati mo fakasemala.

²⁰ Liligi i lou alofa au nea malilie ki Sione, Fau a paa o Selusalemi !

²¹ Ti e ke tali loa ni sakilifisio o le faitotonu, Ni failaulau, mo ni vikitima katoa ; Ti e momoli loa ni pipi tagata i lou aletale.