Pesalemo 5 - Tosi Tapu

Kole fesagai ki le kau lee tui ki le Atua

¹ Ki le pule o le kau sua. Mo ni fulute. Pesalemo a Tavite.

² Ei Eteleno, fakalogo mai lou taliga ki aku masau ! Fakalogo mai ki aku tagi !

³ Tokaga mai ki aku kalaga, ei loku sau mo loku Atua ! Ko koe leia e kau fai ki ai laku kole.

⁴ Eteleno ! i le usu e ke logo ki loku leo ; I le usu e kau maliu o tio kiate koe.

⁵ Talie e leaise ko se Atua a koe e maua lona fiafia i le veli ; E leaise maua e le tagata agaveli lona nofoaga i ou tafa.

⁶ E leaise tutuu le kau vale i ou mua ; Ti e ke vesia kia latou fuli ala e fai ia le agaveli.

⁷ E ke tamate le kau gutu loiloi ; Ti e fakalialia le Eteleno ki le kau tukipo mo le kau kaia.

⁸ Kae ko au, i le lasi o lou manava alofa, e kau ano ki lou fale, Ti e kau su kiate koe i lou fale maokioki i se i.

⁹ Eteleno ! taki au i lou maokioki, o tupu ko oku fili, Fakatokatoka lou ala i oku mua.

¹⁰ Talie e leaise maua se maoki i olatou gutu ; E apele olatou loto i le kaka, Ti ko olatou fatakia ko se tanuma mavaa, Ti e lotou maua i olatou alelo ni masau fakalapulapu.

¹¹ Taai latou ofaipe ni tagata agasala, ei Atua ! Tuku latou ke vivilo i alatou fakakaukau ! Tiaki latou o tupu ko alatou agasala ala e leaise mafai ke lau ! Talie e lotou agatuu kiate koe.

¹² Ti e fiafia loa latou fuli ala e fanaki kiate koe, Ti e lotou kalaga fiafia loa o lee gato, ti e ke malui loa latou. E ke liliu loa ko se fiafiaaga kia latou ala e alofa ki lou suafa.

¹³ Talie e ke tapuaki ki le tagata maokioki, ei Eteleno ! E ke takatakai a ia ki lou kalasia ofaipe se paletau.