Pesalemo 49 - Tosi Tapu

Ko le vaiga o koloa fakamalama

¹ Ki le pule o le kau sua. O vosa o Kole. Pesalemo.

² Ke kotou fakalogo mai ki le nea leinei, kakai fuli ; Ke kotou tuku mai okoutou taliga, koutou fuli e nonofo i le malama nei,

³ Liliki mo lalasi, Mou koloa mo mativa !

⁴ Ka fakasa loa e loku gutu ni masau poto, Ti e maua e loku loto ni fakakaukau e apele i le iloa.

⁵ E fakalogo loku taliga ki masau fakatata a le kau poto, E kau fakamatala loa latou i le tagi o le alepe.

⁶ Kolea e kau i ai loa i le aso o le malaia, Mo ka takatakai au e le agaveli o oku fili ?

⁷ E lotou fanaki ki lolatou makeke, Ti e lotou nekenekea i le lasi o olatou koloa.

⁸ E leaise mafai ai ke totogi e se tagata se tasi tagata, Pe ke soli e se tagata ki le Atua le totogi o lona laumalie.

⁹ Talie e mamafa ai le totogi o olatou laumalie, Ti e leaise mafai ke soko le nea lena i se aso.

¹⁰ E leaise lotou mauli loa o lee gato, E leaise lotou sala loa mo le tio ki le popoko.

¹¹ Talie e lotou tio loa ki ai : E mamate le kau poto, E toe mate foki le tagata valea mo leia e sala atamai, Ti e lotou tuku olatou koloa ki ni iki ake.

¹² E lotou pati i olatou loto e lee gato loa olatou fale, Ti e tuu loa olatou nofoaga i tautupu ki tautupu, Latou ala e fakamauigai olatou igoa i le malama nei katoa.

¹³ Kae ko le tagata leia e fakamauiga e leaise fualoa, E tatau a ia mo manu ala e tamate.

¹⁴ Ko lena lolatou ala, lolatou valea, Ti ko latou ala e mulimuli ia latou e fiafia i alatou masau. - Manava.

¹⁵ Ofaipe se kau manu, e tuku latou ki le nofoaga o le kau mate, E fai e le mate lana nea kai kia latou ; Ti e leaise tuvai e takatakafi latou e le kau agatonu, E puli loa lolatou fulumalie, ko lolatou nofoaga ko le nofoaga o le kau mate.

¹⁶ Kae e fakamauli loa e le Atua loku laumalie mei le nofoaga o le kau mate, Talie e puipui loa e ia au. - Manava.

¹⁷ Ke aua na ke i o tupu e mou koloa se tagata, Pe tupu o lasi a koloa o lona fale,

¹⁸ Talie e leaise ave e ia se nea i lona mate, E leaise ifo ona koloa i ona muli.

¹⁹ E pakia loa a ia i le pati na fiafia a ia i lona mauli, E gaegae loa le fakamalo kiate koe o tupu ko fakafiafia ala na ke soli,

²⁰ E ke ano maoki loa ki le nofoaga o ou tamana, Ala e leaise toe tio loa ki le malama i se aso.

²¹ Ko le tagata leia e mauiga, kae e leaise poto, E tatau mo manu ala e tamate.