Pesalemo 48 - Tosi Tapu

Ko le fulumalie o Sione

¹ Katiko. Pesalemo o vosa o Kole.

² E lasi le Eteleno, ti e malie ke fakavikiviki kiate ia I le kolo o lotatou Atua, i lona mauga maokioki.

³ E fulumalie le mauga, le fiafiaaga o le malama nei katoa, le mauga ko Sione ; Ko le potu noleto, ko le kolo a ia o le sau lasi.

⁴ E iloa le Atua, i ona fale sau, ko se kolo ulufaga taualuga.

⁵ Talie ko leinei, na fakatasi a sau, Ti na lotou saele fakatasi ki Sione.

⁶ Na lotou tio, ti na lotou punamauli ; Na lotou i, ti na lotou sosola.

⁷ I ai na maua loa latou e se lulu, Ofaipe le fafine tinae leia na laga lona ganea.

⁸ Na kapu latou e le matagi o le potu esite, Leia e fatifati ia a vaka o Talesisi.

⁹ Ko le nea leia na motou logo ki lona fakamatala, na motou tio ki ai I le kolo o le Eteleno o kau tau, I le kolo o lomatou Atua : E taupau a ia e le Atua o lee gato. - Manava.

¹⁰ Ei Atua, e motou manatu ki lou agamalie I loto malie o lou fale tapu.

¹¹ Ofaipe lou suafa, ei Atua, E logo lou fakavikiviki o kaku ki potupotu o le malama nei ! E apele lou lima atamai i le faitotonu.

¹² E fakafiafia le mauga o Sione, E nekenekea a taineliki o Suta, O tupu ko au fakamaauaga.

¹³ Ke kotou foli i Sione, kotou foli i lona kaua takai, Ke kotou lau le lasi o ona tule,

¹⁴ Ke kotou tio ki lona kaua, Ke kotou tokaga ki ona fale lalasi, O tupu ke kotou fakamatala a ia ki le tautupu muli.

¹⁵ Ko lena le Atua leia ko lomatou Atua o lee gato ; E tausi loa e ia matou o kaku ki le mate.