Pesalemo 47 - Tosi Tapu

Ko le mafimafi o le Atua

¹ Ki le pule o le kau sua. O vosa o Kole. Pesalemo.

² Kotou fuli, atu kakai, ke kotou pasipasi okoutou lima ! Ke kotou fai ni kalaga fakafiafia ki le Atua !

³ Talie e fakaii ai le Eteleno, le Taualuga, Ko se sau lasi a ia ki malama nei katoa.

⁴ E tuku e ia ni kakai ke fakalogo kia tatou, E tuku e ia ni puleaga ki lalo o tou vae.

⁵ E filifili e ia kia tatou lotatou tofiga, Le kololia o Sakopo leia e alofa a ia ki ai. - Manava.

⁶ E pale le Atua i loto malie o kalaga o le malo, E saele mai le Eteleno i le tagi o le fakatagi pupusi.

⁷ Ke kotou sua ki le Atua, ke kotou sua ! Ke kotou sua ki lotatou sau, ke kotou sua !

⁸ Talie ko le Atua e sau i le malama nei katoa : Ke kotou sua se katiko !

⁹ E pule le Atua i atu puleaga, E eke le Atua i lona ekeekeaga fakasau maokioki.

¹⁰ E fakatasi a pule o kakai Ki le kakai o le Atua o Apalaamo ; Talie a le Atua a paletau o le malama nei : E taualuga ai a ia.