Pesalemo 45 - Tosi Tapu

Le faiavaga o le sau

¹ Ki le pule o le kau sua. I le lilio. O vosa o Kole. Katiko. Sua o le mamana.

² E mapunapuna ni masau fakalaukau i loku loto. E kau pati : E tuku laku gaoi ki le sau ! Ke fai loku alelo pe le peni a se tagata maau !

³ E ke tupulaga toka tasi i vosa o le tagata : E apele le kalasia i ou laugutu : Koia na tapuaki ai le Atua kiate koe o lee gato.

⁴ Tagata tau loto toa, ke ke toi lau seleta ki lou fetuu, - lou teu mo lou kololia,

⁵ Io, lou kololia ! - Ke ke malo ; ke ke eke ki lau saliote, Ke ke puipui le maoki, mo le agamalu, mo le faitotonu ! Ti ke sa lou lima atamai i ni gaoi lalasi !

⁶ E matakakai au gasau ; E sisiga loa ki lalo ni puleaga i ou vae ; E lotou pupui loa a mafu o fili o le sau.

⁷ Ko lou ekeekeaga fakasau, ei Atua, e tuu o lee gato ; Ko le tokotoko o lau pule ko se tokotoko o le maokioki.

⁸ E ke alofa ki le faitotonu, kae e ke vesia ki le agaveli : Koia, ei Atua, ko lou Atua na takai ia a koe Ki se lolo o le fiafia, o lasi ake i ou kaukaunea.

⁹ Ko le mila, mo le aloese, mo le kase e fakamanogi ia o kofu ; I loto o fale sau lei, e fakafiafia a nea faimusika va kiate koe.

¹⁰ E kau ni taine o sau i ou mamanaaga ; E nofo le fafine sau i lou fetuu atamai, kua teu a ia ki le aulo o Ofile.

¹¹ Ke ke fakalogo mai, ei loku taine, ke ke tio ti mo ke fakalogo mai lou taliga ; Ke ke galoi lou kakai mo le fale o lou tamana.

¹² E ave e le sau ona mamana ki lou fulumalie ; O tupu ko lou Aliki a ia, ke ke fai au su kiate ia.

¹³ Ti e au loa le taine o Tile mo le kau mou koloa o le kakai, Mo ni moliga, o afa lou alofa.

¹⁴ E gigila katoa le taine o le sau i loto o le fale sau ; E kofu e ia se kofu na lalaga ki le aulo.

¹⁵ E ave a ia ki mua o le sau, i se kofu na teuteu ke fulumalie, Ti e muli iate ia ni taineliki tupulaga, ko ona kaukaunea, ala na aumai kiate koe.

¹⁶ Na fakaulu latou i loto malie o ni fakafiafia, mo ni nekenekea : E lotou ulu ki le fale o le sau.

¹⁷ E fetogi loa e au fanau ou tamana ; E ke fakanofo loa latou ke pule i le fenua katoa.

¹⁸ E fakamanatu loa lou suafa i tautupu fuli : Koia e fakafetai ai loa a kakai kiate koe i tautupu fuli o lee gato.