Pesalemo 44 - Tosi Tapu

Kole a Iselaele i le fakaveliveli

¹ Ki le pule o le kau sua. A vosa o Kole. Katiko.

² Ei Atua ! na motou logo i omatou taliga, Na fakamatala mai kia matou e omatou tamana, A gaoi lalasi ala na ke fai i olatou aso, le temi mua.

³ Na ke kapu ki lou lima ni puleaga ke fakanofo latou, Na ke taai ni kakai ke fakamafolafola latou.

⁴ Talie na leaise lotou maua le fenua o tupu ko alatou seleta, Na leaise saofaki latou e olatou lima : Kae ko lou lima atamai, ko lou makeke, ko le malama o ou mata, Talie na ke alofa kia latou.

⁵ Ei Atua ! ko koe ko loku sau : Ke ke fakatotonu le fakamauli o Sakopo !

⁶ Fakatasi mo koe e motou tamate omatou fili, Fakatasi mo lou suafa e motou takatakafi latou ala e agatuu mai kia matou.

⁷ Talie e leaise ko laku kalolo leia e kau fanaki ki ai, E leaise ko laku seleta leia e saofaki ia loa au ;

⁸ Kae ko koe leia e saofaki ia matou i omatou fili, Ti e fakaluma ia latou ala e vesia mai kia matou.

⁹ E motou fakakololia i le Atua i aso fuli, Ti e motou fakafetai loa ki lou suafa o lee gato. - Manava.

¹⁰ Kae ko leinei, e ke tekei matou, e ke fakaapele matou i le luma, E leaise koi ke ano o tau mo amatou kau solia.

¹¹ E ke tuku ke motou solomuli i mua o le fili, Ti ko latou ala e vesia kia matou e kaia ia a koloa o omatou kau mate.

¹² E ke tuku matou kia latou ofaipe ni ovi kua filifili ke tamate ; E ke veteki matou i atu puleaga.

¹³ E ke fakatau lou kakai ki se nea noa, E leaise mauiga a ia kiate koe.

¹⁴ E ke tuku matou ke liliu ko se nea fakalumaluma ki atu puleaga ia matou, Ko se nea fakagologolo mo fakakata kia latou ala e takatakai ia matou.

¹⁵ E ke tuku ke fatu e atu puleaga ni lau kia matou, Ti ke kalokalo a ulu o kakai kia matou.

¹⁶ E tuu loku fakavelivelii i oku mua i aso fuli, Ti e ufiufi oku mata e le luma,

¹⁷ O tupu ko le leo o leia e pati veli mo lau veli mai kiate au, O tupu ko le tio ki le fili mo leia e lagavaka mai kiate au.

¹⁸ E soko a nea fuli ana kia matou, kae na leaise motou galoi a koe, Ti na leaise motou maumaui lau sai.

¹⁹ Na leaise maliu kese omatou loto, Na leaise fakamamao o matou vae i lou ala,

²⁰ Ke ke takatakafi ai matou i le nofoaga o kuli vao, Ti ke ke ufiufi ai matou ki le malu o le mate.

²¹ Kapau na motou galoi le suafa o lomatou Atua, Ti na motou siki omatou lima ki se atua kese,

²² Pe leaise iloa loa a ia e le Atua, Leia e iloa ia a manatu fakapulipuli o le loto ?

²³ Kae e tuku ko koe leia e tamate ai matou i aso fuli, Leia e tio ai kia matou ofaipe ni ovi ala e ave ki le fale tamate manu.

²⁴ Aliki, ke ke alaala ! Kolea e ke moe ai ? Ke ke alaala ! Aua na ke tekei matou o lee gato ?

²⁵ Kolea e ke fufu ai ou mata kia matou ? Kolea e ke galo ai iate koe lomatou malaia mo lomatou fakaveliveli ?

²⁶ Talie kua tonatona omatou laumalie i le efu, Ti kua pipiki omatou tino ki le kele.

²⁷ Ke ke tuu ki aluga, o saofaki matou ! Fakamauli matou o tupu ko lou agamalie !