Pesalemo 41 - Tosi Tapu

Kole a se tagata masaki leia na kakaai e lona kaukaunea

¹ Ki le pule o le kau sua. Pesalemo a Tavite.

² Manuia leia e tokaga ki le mativa ! I le aso o le malaia e saofaki a ia e le Eteleno ;

³ E taupau a ia e le Eteleno ti e fakatologa e ia lona mauli. E manuia a ia i le malama nei, Ti e leaise ke tuku a ia ke pule faitalisa ki ai ona fili.

⁴ E fakamakeke a ia e le Eteleno i lona moeaga o le mamae, E ke faitoo a ia i ona masaki fuli.

⁵ E kau pati : Eteleno, alofa mai kiate au ! Fakamauli loku laumalie ! talie na kau agasala kiate koe.

⁶ E pati fakaveli oku fili kiate au : Pe mate loa a ia afea ? Pe puli loa lona igoa afea ?

⁷ Ka au se tasi o asiasi mai kiate au, e masau loi a ia : E afaafa e ia ni nea ala ke lauveli ai kiate au ; E ano a ia, ti e fakamatala e ia i fafo.

⁸ E femumusuaki kiate au latou fuli ala e vesia kiate au ; E lotou pati e kau puli loa i loku malaia.

⁹ E veli lona masaki, Ko lena kua moe a ia i lalo, e leaise toe tuu loa a ia ki aluga !

¹⁰ Ko ia foki leia na kau tokamalie mo ia, Leia na maua ia laku fanaki ti na kai ia laku pane e siki ia lona mulivae kiate au.

¹¹ Ko koe, Eteleno, alofa mai kiate au, ti ke ke fakatuu au ki aluga, Ti e kau liufaki loa kia latou lolatou totogi.

¹² E kau iloa loa e ke alofa kiate au, Mo ka e leaise malo loku fili iate au.

¹³ Na ke fakamakeke au o tupu ko loku agatonu, Ti na ke fakanofo au i lou agaiaga o lee gato.

¹⁴ Ke fakafetai ki le Eteleno, le Atua o Iselaele, i sekulo mo sekulo ! Amene ! Amene !