Pesalemo 40 - Tosi Tapu

Fakafetai ki le Atua o uiga mo lana tokoi

¹ Ki le pule o le kau sua. A Tavite. Pesalemo.

² Na kau tuku ki le Eteleno laku amanaki malie ; Ti na punou mai a ia kiate au, o fakalogo ki aku tagi.

³ Na too ake e ia au i le popoko o le maumau, I le takele o le pela ; Ti na fakatuu e ia oku vae i le utu, Na fakamakeke e ia oku laka.

⁴ Na tuku e ia ki loku gutu se katiko foou, Se fakafetai ki lotatou Atua. Na tio ki ai le toka api, ti na lotou i loa kiate ia, Ti na lotou fanaki loa ki le Eteleno.

⁵ Manuia le tagata leia e tuku lana fanaki ki le Eteleno, Ti e leaise maliu ki le kau fia taualuga mo le kau gutu loiloi !

⁶ Eteleno, loku Atua ! na ke liuliuga Au gaoi fakatalatupua mo au fakatuutuu kia matou. E leaise tasi e tatau mo koe : E kau fia fakasa ti e kau fia fakamatala au gaoi, Kae e lotou lasi ai ke kau fakamatala fuli latou.

⁷ E leaise ke oli ki se sakilifisio pe ko se moliga, Na ke fakamavaa oku taliga. E leaise ke kole se failaulau pe ko se vikitima ki agasala.

⁸ Koia e kau pati ai : Ko leinei, e kau au Mo le takaiga tosi leia na tosi kiate au.

⁹ E kau loto ke fai lou finegalo, ei loku Atua ! Ti e tuu lau lao i le takele o loku loto.

¹⁰ E kau fakasa le faitotonu i le fakatasi lasi ; Ko leinei, e leaise kau tapono oku laugutu, Eteleno, e ke iloa a ia !

¹¹ E leaise kau taofi i loku loto lau faitotonu, E kau fakasa lou maoki mo lou fakamauli ; E leaise kau fufu lou agamalie mo lou agatonu I le fakatasi lasi.

¹² Ko koe, Eteleno ! e leaise ke fakafiti loa kiate au lou manava alofa ; E taupau loa au e lou agamalie mo lou agatonu o lee gato.

¹³ Talie e takatakai au e ni mamae ala e leaise feala ke lau ; Kua maua au e aku agaveveli, Ti e leaise kau mafai ia le tio kia latou. E lotou lasi ake i fulu o loku ulu, Ti kua puli loku lotomakeke.

¹⁴ Alofa o saofaki au, Eteleno ! Eteleno, au vave o tokoi mai kiate au !

¹⁵ Ke lotou luma fimo ti ke lotou mamae fuli, Latou ala e loto ke too loku mauli ! Ke lotou solomuli ti ke lotou luma, Latou ala e oli ki loku malaia !

¹⁶ Ke lotou punamauli i le lasi o lolatou luma, Latou ala e kakata mai kiate au.

¹⁷ Kae ko latou fuli ala e afa ia a koe Ke lotou nekenekea mo fiafia iate koe, Ko latou fuli ala e alofa ki lou fakamauli Ke lotou pati tuumau : ke fakafetai ki le Eteleno !

¹⁸ Ko au, e kau mativa mo maimoa ; Kae e manatu le Aliki kiate au. Ko loku tokoi mo loku fakamauli ko koe : Loku Atua, aua na ke tuvai !