Pesalemo 39 - Tosi Tapu

Ko le noa o le tagata

¹ Ki le pule o le kau sua. Kia Setutune. Pesalemo a Tavite.

² Na kau pati : E kau tokaga loa ki oku ala, Ke aua na kau agasala i loku alelo ; E kau fai loa se taofi ki loku gutu, I le temi katoa e nofo ai le fili i oku mua.

³ Na kau nofo fakalologo, na leaise kau masau ; Na kau fakaleemu, logo loku mamae, Kae na asilisili ake loku mamae.

⁴ Na vela loku loto iate au, Na tutu au e se afi i loto, Ti na au loa le masau ki loku alelo.

⁵ Eteleno ! fakasa mai kiate au le gatoaga o loku mauli, Mo le fuafua o oku aso, O tupu ke kau iloa le lasi o loku gaegae.

⁶ Ko leinei, na ke tuku ki oku aso le lau lasi o le alofilima, Ti e fai loku mauli pe se nea noa i ou mua. Io, ko tagata fuli e tuu i aluga e faipe se tukumanava. - Manava.

⁷ Io, e evaeva le tagata ofaipe se malu, E taugaoi noa a ia ; E tanaki e ia, kae e leaise iloa e ia pe ko ai e maua ia loa.

⁸ I le lakaga nei, Aliki, kolea e kau amanaki malie ki ai ? E iate koe laku amanaki malie.

⁹ Saofaki au i aku agatuu fuli ! Aua na ke tuku au ke kau luma i mua o le tagata valea !

¹⁰ E kau fakaleemu, e leaise fakamavaa loku gutu, Talie ko koe leia e gaoi.

¹¹ Fulusi kese au fa ta iate au ! E siga i ta o lou lima.

¹² E ke ako le tagata o tautea a ia i lana agaveli ; E ke maumau ofaipe se ugogo, le nea leia e alofa lasi ki ai. Io, ko tagata fuli ko se tukumanava. - Manava.

¹³ Fakalogo mai ki laku kole, Eteleno, ti ke tokaga mai lou taliga ki aku tagi ! Aua na ke aganoa ki oku loimata ! Talie ko se matapule au i lou fale, Ko se tagata noa au, ofaipe oku tamana fuli.

¹⁴ Ave kese ou mata iate au, ti ke tuku au ke kau manavanava, I mua o laku ano, o puli oki !