Pesalemo 38 - Tosi Tapu

le fakasemala o le tagata agasala

¹ Pesalemo a Tavite. Tausi alofa.

² Eteleno ! Aua na ke fakatua au i lou sausau, Ti aua na ke tautea au i lou ita lasi.

³ Talie na tau kiate au au gasau, Ti na vilo lou lima mamafa kiate au.

⁴ E leaise nea fua koi malie i loku tino, o tupu ko lou sausau ; E leaise koi maua se makeke i oku ivi, o tupu ko laku agasala.

⁵ Talie e malaga aku agaveli i loku ulu ; Ofaipe se amoga mamafa, e lotou taomi au.

⁶ E fufula ti e aukaua oku lavea, O tupu ko loku valea.

⁷ E kau mapelu lua ki lalo, ti e kau maemaeia lasi ai ; E kau saele i le mamae i le aso katoa.

⁸ Talie e kai loku tino e se masaki veli : E leaise nea fua koi sao i loku tino.

⁹ Kua oki loku makeke, ti kua kau fatifati katoa. E kau tagi o tupu ko le lasi o le mamae o loku loto.

¹⁰ Aliki ! E tuku a oli fuli o loku loto i ou mua, Ti e leaise munia aku tukumanava kiate koe.

¹¹ Kua ta vave loku mafu, kua puli loku makeke, Ti kua fakapouli oku mata.

¹² Kua fakamamao oku kaukaunea mo oku kaiga i loku lavea, Ti kua tutuu oku famili totonu mei mamao.

¹³ Ko latou ala e loto ki loku mauli e teuteu ia alatou masele ; Ko latou ala e afa ki loku malaia e fai ia ni masau veli kiate au, Ti e lotou fakakaukaui ni kakaa i le aso katoa.

¹⁴ Kae ko au, e kau faipe se tagata tulituli, e leaise kau logo ; E kau faipe se tagata gutu mate, e leaise kau fakamavaa loku gutu.

¹⁵ E kau faipe se tagata leia e leaise logo, Ti e leaise maua ia se tali i lona gutu.

¹⁶ Eteleno ! ko koe leia e kau amanaki malie ki ai ; E ke tali loa, Aliki, loku Atua !

¹⁷ Talie e kau pati : Aua na ke fakataga ke lotou fiafia iate au, Ke lotou malaga mai kiate au, mo ka seke loku vae !

¹⁸ Talie kua vave fua loku siga, Ti e tuu mau loku mamae i oku mua.

¹⁹ Talie e kau fakamaoki ki laku agaveli, E kau nofo i le mamae o tupu ko laku agasala.

²⁰ Kae e apele oku fili i le mauli mo makeke ; E toka api ai latou ala e vesia mai kiate au kae e leaise sona tupuaga.

²¹ E lotou totogi mai kiate au le malie ki le veli ; E lotou fili mai kiate au, talie e kau afa le malie.

²² Ke aua na ke tiaki au, Eteleno ! Ei loku Atua, ke aua na ke fakamamao iate au !

²³ Ke ke au vave o saofaki au, ei Aliki, loku fakamauli !