Pesalemo 37 - Tosi Tapu

Ko le kesekese o le tagata agatonu mo le tagata agaveli

¹ A Tavite. Aua na ke ita ki tagata agaveli. Aua na ke finenonofo kia latou ala e fai ia le veli.

² Talie e vave lolatou tuuti ofaipe le mutie, Ti e lotou gini vave ofaipe le mutie sesega.

³ Ke ke fanaki ki le Eteleno, ti ke fai le nea leia e malie ; Ke ke maua le fenua ko lou nofoaga, ti ke ke fai le malie ko lau nea kai.

⁴ Ke ke fai ki le Eteleno lou fiafiaaga lasi, Ti e soli atu loa e ia kiate koe le nea leia e oli ki ai lou loto.

⁵ Tuku lou mauli ki le Eteleno, Tuku lau fanaki kiate ia, ti e gaoi loa a ia.

⁶ E fakasa loa e ia lou agatonu ofaipe le malama, Ti mo lou faitotonu ofaipe le laa i le lalatea.

⁷ Ke ke fakalologo i mua o le Eteleno, ti ke ke amanaki malie kiate ia ; Ke aua na ke mamae ki leia e manuia ona ala, Ki le tagata leia e fakasoko ia ana fakatuutuu veveli.

⁸ Ke ke tuku le ita, ke ke tiaki le itaita veli ; Ke aua na ke ita, talie e ke fai loa le nea leia e veli.

⁹ Talie e motusi loa le kau agaveli ; Kae ko latou ala e amanaki malie ki le Eteleno e maua ia loa le fenua.

¹⁰ Koi toe fua se ga temi ikiiki, ti e puli loa le tagata agaveli ; E ke tio ki le ganea leia na nofo ai, ti kua puli a ia.

¹¹ E maua e le kau mativa le fenua, Ti e lotou fiafia lasi i le tokamalie.

¹² E fai e le tagata agaveli ni fakatuutuu veli ki le tagata agatonu, Ti e gugu e ia ona nifo kiate ia.

¹³ E kata le Eteleno ki le tagata agaveli, Talie e tio a ia kua soko mai lona aso.

¹⁴ E too e le kau agaveveli alatou seleta, E lotou fafao alatou kalolo Ke fakavilo ki le kele le tagata mativa mo le tagata maimoa, Ke tamate latou ala e saele i le agatonu.

¹⁵ Kae e ulu alatou seleta ki olatou mafu totonu, Ti e fatifati alatou gasau.

¹⁶ E malie ake le ganea ikiiki a le tagata agatonu I le mou koloa o se toka api o tagata agaveli ;

¹⁷ Talie fatifati loa a lima o tagata agaveli, Kae fakamauli loa le Eteleno le kau agatonu.

¹⁸ E iloa e le Eteleno a aso o le kau agatonu ; Ti e tologa olatou tofiga o lee gato.

¹⁹ E leaise lotou luma i le aso o le malaia, Ti e lotou makokona i aso o le oge.

²⁰ Kae e mamate le kau agaveli ; Ti ko fili o le Eteleno, ofaipe faisaga mutie fulumalilie, E lotou pupuli loa, e lotou pupuli loa ofaipe le afu.

²¹ E too e le tagata agaveli ni maua, ti e leaise ui e ia ; E loto alofa le tagata agatonu, ti e solisoli a ia.

²² Talie ko latou ala e tapuaki e le Eteleno e maua ia le fenua ; Ti ko latou ala e fakamalaia e ia e motusi loa.

²³ E fakamakeke e le Eteleno a lakaaga o le tagata malie, Ti e fiafia a ia i lona ala ;

²⁴ Ka siga a ia, e leaise nofo a ia i le kele, Talie e too e le Eteleno lona lima.

²⁵ Na kau tupulaga, ti kua kau matua, Kae e leikiaise kau tio na tiaki le tagata agatonu, Pe na kaiisi lona sakoga lana pane.

²⁶ I aso fuli e manava alofa, ti e kai solisoli a ia ; Ti e manuia lona sakoga.

²⁷ Ke ke maliu kese i le veli, fai le malie, Ti ke ke maua lou nofoaga o lee gato.

²⁸ Talie e alofa le Eteleno ki le faitotonu, Ti e leaise tiaki e ia lana kau agatonu : E taupau tuumau e ia latou. Kae e motusi e ia le sakoga o le kau agaveli.

²⁹ E maua loa e le kau agatonu le fenua, Ti e lotou nonofo loa i ai o lee gato.

³⁰ E fakasa e le gutu o le tagata agatonu le poto, Ti e masau lona alelo i le maoki.

³¹ E nofo le lao o lona Atua i lona loto ; E leaise seke ona laka.

³² E lamalama e le tagata agaveli le tagata agatonu, Ti e afa e ia ke tamate a ia.

³³ Kae e leaise tuku a ia e le Eteleno ki ona lima, Ti e leaise fakatua e ia a ia mo ka fakamaau a ia.

³⁴ Ke ke amanaki malie ki le Eteleno, ti ke ke tausi lona ala, Ti e siki loa e ia a koe o tupu ke ke maua le fenua ; E ke tio loa e motusi le kau agaveli.

³⁵ Na kau tio ki le tagata agaveli i lona makeke katoa ; Na mafolafola a ia ofaipe se laakau sesega.

³⁶ Na fakalaka a ia, ti ko leinei, kua puli a ia ; Na kau afa a ia, kae e leaise kau maua a ia.

³⁷ Ke ke tio ki le tagata leia e saosaoa, Ti ke ke tokaga ki le tagata leia e agatonu ; Talie e i ai se sakoga ki le tagata o le tokamalie.

³⁸ Kae e maumaui fuli le kau agatuu, Ti e motusi le sakoga o le kau agaveli.

³⁹ E au le fakamauli o le kau agatonu mei le Eteleno : Ko ia ko lolatou puipuiaga i le aso o le mamae.

⁴⁰ E tokoi le Eteleno kia latou, ti e fakamauli e ia latou. E saofaki e ia latou i le kau agaveli, ti e fakamauli e ia latou, Talie e lotou afa lolatou mumuniaga iate ia.