Pesalemo 35 - Tosi Tapu

Kole a Tavite ki ona fili

¹ A Tavite. Eteleno ! Puipui au i oku fili, Ke ke tau kia latou ala e tau mai kiate au !

² Ke ke too le paletau ikiiki mo le paletau lasi, Ti ke ke tuu ki aluga o saofaki au !

³ Ke ke siki le tao mo le savelo kia latou ala e fakaveliveli mai kiate au ! Ke ke pati ki loku laumalie : Ko au ko lou fakamauli !

⁴ Ke lotou luma ti mo mamae latou ala e loto ki loku mauli ! Ke lotou solomuli, ti ke lotou luma, latou ala e fakakaukau ki loku mate !

⁵ Ke lotou faipe le penu leia e veteki e le matagi, Ti ke kapu latou e le aselo a le Eteleno !

⁶ Ke fakapouli mo sekeseke olatou ala, Ti ke kapu latou e le aselo o le Eteleno !

⁷ Talie na lotou maselei noa au i se popoko, Na lotou kenu fakafuanoa le popoko ke vilo ki ai loku mauli.

⁸ Ke tapo fakaofolele latou e le maumau, Ke lotou pikiia i le masele leia na lotou fai, Ke lotou vivilo ki ai ti ke lotou mamate ai !

⁹ Ti e fiafia loa loku laumalie i le Eteleno, Ti e nekenekea loa a ia o tupu ko lana fakamauli.

¹⁰ E pati loa oku ivi fuli : Eteleno ! Ko ai e tatau mo koe, Ke fakamauli ia le tagata mativa i se tasi leia e makeke ake iate ia, Io, le tagata mativa mo le tagata maimoa i leia e fakamakeke ia laua ?

¹¹ Kua tuu ki aluga ni kau fakamaoki loi : E lotou vesili kiate au le nea leia e leaise kau iloa.

¹² E lotou liufaki kiate au le veli ki le malie : E toka tasi loku laumalie.

¹³ Kae ko au, i le aso leia na lotou masaki ai, na kau kofu se taga, Na kau fakamamae loku laumalie i le sesunio, Na kau peluki loku ulu ki loku fatafata, ti na kau faikole.

¹⁴ Na kau tolotolo mamalie o sakinake ki soku kaukaunea pe ki soku taina ; O sakinake ki loku tinana, na kau mapelu ki lalo i le mamae.

¹⁵ Kae ko leinei kua kau siga, e lotou fakatasi ti e lotou fiafia, E lotou fakatasi fakafufu o lauveli kiate au, E leaise lotou manavanava loku sae.

¹⁶ E lotou gugu olatou nifo kiate au o fakatasi mo le kau fakalialia mo le kau gologolo.

¹⁷ Aliki ! E kaku loa kiafea lau tio kia latou ? Ke ke Puipui loku laumalie i alatou masele ! Loku mauli i uviki laione !

¹⁸ E kau fakafetai loa kiate koe i le fakatasi lasi, E kau sua loa kiate koe i loto malie o se kakai toka api.

¹⁹ Aua na ke tuku ke fiafia kiate au latou ala kua liliu ko oku fili kae e leai sona tupuaga : Ke aua na tio fakaveli mai kiate au latou ala e vesia fakafuanoa mai kiate au.

²⁰ Talie e leaise lotou masau ki le tokamalie, Kae e lotou fakatupu ia le veli ki le kakai leia e mauli fimalie i le fenua.

²¹ E lotou fakamaga kiate au olatou gutu, E lotou pati : A ! A ! e tio omatou mata !

²² Eteleno, e ke tio ki ai ! aua na ke nofo fakalologo ! Aliki, aua na ke fakamamao iate au !

²³ Ke ke alaala, ke ke alaala o fakamaau au o mulimuli ki loku agatonu ! Ei loku Atua mo loku Aliki, ke ke puipui loku mauli !

²⁴ Ke ke fakamaau au o mulimuli ki lou faitotonu, Eteleno, loku Atua ! Ti ke aua na lotou fiafia iate au !

²⁵ Ke aua na lotou pati i olatou loto : A ! ko lena le nea leia e motou loto ki ai ! Ke aua na lotou pati : Na motou folo a ia !

²⁶ Ke lotou luma fuli fakatasi ti ke lotou i, Latou ala e fiafia o tupu ko loku malaia ! Ke lotou kofu ki le luma mo le fakalialia, Latou ala e agatuu mai kiate au !

²⁷ Ke lotou maua se fiafia lasi mo se fiafia, Latou ala e fiafia i loku mea, Ti ke lotou pati tuumau : Ke fakafetai ki le Eteleno, Leia e loto ki le tokamalie o lana tagata fakasausau !

²⁸ Ti e fakasa loa e loku alelo lou faitotonu, Io, e fakasa loa e ia lou malie i aso fuli.