Pesalemo 33 - Tosi Tapu

Pesalemo o le fiafia

¹ Kau maokioki, kotou fiafia i le Eteleno ! E gali le fakafetai mo le kau agatonu.

² Kotou fakafetai ki le Eteleno i le alepe ! Kotou vikiviki kiate ia i le lute va kau agafulu.

³ Kotou sua kiate ia se katiko foou ! Kotou fakagugulu akoutou nea faimusika mo okoutou leo !

⁴ Talie e totonu le folafola a le Eteleno, Ti e fai ana gaoi fuli i le agatonu.

⁵ E alofa a ia ki le faitotonu mo le maoki ; E apele le malama nei i le agamalie o le Eteleno.

⁶ Na fakatupu le atu lagi e le folafola a le Eteleno, Ti mo lona fuatau katoa e le tukumanava o lona gutu.

⁷ E tanaki fakatuuga e ia a vai o le tai, Ti e tuku e ia ki ni tanakiaga vai a moana.

⁸ Ke i le malama nei katoa ki le Eteleno ! Ke lulu le kakai katoa o le malama nei i ona mua !

⁹ Talie e pati a ia, ti e soko le nea ; E fakatotonu e ia, ti e tuku a ia.

¹⁰ E maumaui e le Eteleno a fakatuutuu a atu puleaga, E fakanoai e ia a fakatuutuu a kakai ;

¹¹ E tuu fakatuutuu a le Eteleno o lee gato, Ti mo oli o lona loto i tautupu mo tautupu.

¹² Manuia le puleaga leia e Atua ki le Eteleno ! Manuia le kakai leia na filifili e ia ko lona tofiga !

¹³ E tio le Eteleno mei le atu lagi, E tio a ia ki vosa fuli o le tagata ;

¹⁴ Mei le potu o lona nofoaga, e tio a ia Ki le kakai katoa o le malama nei,

¹⁵ A ia leia na gaoi ia a loto o tagata fuli, Leia e tokaga ki alatou gaoi fuli.

¹⁶ E leaise ko se solia toka api leia e saofaki ia le sau, Ti e leaise ko se makeke lasi leia e saofaki ia le tagata toa.

¹⁷ E leaise se uiga o le makeke o le osi ki le fakamauli, Ti e leaise mafai e lona makeke katoa ke soli ia le malo.

¹⁸ Ko leinei, e tio a mata o le Eteleno kia latou ala e i kiate ia, Kia latou ala e amanaki malie ki lona agamalie,

¹⁹ O tupu ke taaki olatou laumalie i le mate, Ti e fakamauli ia latou i loto malie o le oge.

²⁰ E amanaki malie omatou laumalie ki le Eteleno : Ko lomatou tokoi a ia, ti mo lomatou paletau.

²¹ Talie e fiafia omatou loto iate ia, Ti e motou fanaki ki lona suafa maokioki.

²² Eteleno ! Ke nofo lou kalasia ia matou, Talie e motou amanaki malie kiate koe !