Pesalemo 32 - Tosi Tapu

Ko le fiafia o le tagata agasala leia kua fakamolemole ana agasala

¹ A Tavite. Katiko. Manuia leia kua fakamolemole ki ai lana patigataa, Leia kua uufi lana agasala.

² Manuia le tagata leia e leaise lau ki ai e le Eteleno lana agaveli, Ti e leaise maua se kaka i lona loto !

³ I le temi katoa na kau fakalologo ai, na okioki oku ivi, Na kau tagi i le aso katoa.

⁴ Talie na mamafa lou lima kiate au i le pouli mo le ao, Na malo noa loku makeke ofaipe leia o le temi vevela. - Manava.

⁵ Na kau fakasa kiate koe laku agasala, Na leaise kau fufu laku agaveli ; Na kau pati : E kau vevete loa aku patigataa ki le Eteleno ! Ti na ke soloi le tua o laku agasala. - Manava.

⁶ Koia ke faikole kiate koe a tagata agatonu fuli i le temi faigamalie ! Kapau e puke ni vai lalasi, e leaise lotou kaku loa kia latou.

⁷ Ko se mumuniaga a koe kiate au, e ke puipui au i le mamae, E ke takatakai au ki ni sua o le fakamauli. - Manava.

⁸ E kau ako loa kiate koe ti e kau fakasa loa kiate koe le ala leia e tonu ke ke muli ai. E kau tokoi loa kiate koe, ti e kau tuku tuumau loa oku mata kiate koe.

⁹ Aua na kotou faipe se osi pe ko se mule sala atamai, E taofi laua ki se fakagutu ti e taki laua ki se maea O tupu ke aua na la fakafeofi kiate koe.

¹⁰ E lasi ni mamae e maua e le tagata agaveli ; Kae ko leia e fanaki ki le Eteleno e takatakai a ia e lona kalasia.

¹¹ Kau agatonu ! ke kotou fiafia i le Eteleno ti ke kotou nekenekea ! Ke kotou fai ni kalaga fakafiafia, koutou fuli ala e loto sako !