Pesalemo 31 - Tosi Tapu

Kole mo le fanaki i le temi o le asiasii

¹ Ki le pule o le kau sua. Pesalemo a Tavite.

² Eteleno ! e kau afa iate koe loku mumuniaga : Ke aua na kau luma i se aso ! Fakamauli au i lou faitotonu !

³ Tuku mai lou taliga kiate au, fakatavili o saofaki au ! Ke ke fai kiate au pe se utu ulufaga, se kolo tau, Leia e kau maua ai loku fakamauli !

⁴ Talie ko loku utu a koe, loku kolo tau ; Koia e ke taki loa au o tupu ko lou suafa, e ke fakailoilo loa kiate au le ala.

⁵ E ke fakamavae loa au i le kupega leia na lotou folasi kiate au ; Talie ko koe ko loku puipuiaga.

⁶ E kau tuku loku laumalie ki ou lima ; E ke saofaki loa au, Eteleno, Atua o le maoki !

⁷ E kau vesia kia latou ala e pipiki ki ni taulaatua noa, Ti e kau fanaki ki le Eteleno.

⁸ E kau fiafia loa mo nekenekea loa i lou kalasia : Talie e ke tio ki loku mamae, e ke iloa a i o loku loto,

⁹ Koia e leaise ke tuku ai loa au ki lima o le fili, kae e ke fakatuu loa oku vae ki le potu laulasi.

¹⁰ Alofa mai kiate au, Eteleno ! talie kua kau nofo i le mamae ; Kua veli oku mata, mo loku laumalie, mo loku tino i le mamae.

¹¹ E fakaokioki loku mauli i le mamae, mo oku fetuu i le tagi. Kua puli loku makeke o tupu ko laku agaveli, Ti kua maumau oku ivi.

¹² Kua kau liliu ko se nea gologolo ki oku fili fuli, Ko se nea gologolo lasi ki oku kaiga, ko se nea fakaii ki oku kaukaunea. Ko latou ala e tio kiate au i fafo e sosola mamao iate au.

¹³ Kua galoi au e loto ofaipe se tagata leia kua mate, Kua kau faipe se ipu leia kua maumau.

¹⁴ E kau logo ki lauveli a le toka api, mo le fakaii leia e taka i oku tafatafa, Mo ka lotou fonofono kiate au ke lotou too loku mauli.

¹⁵ Kae e kau fanaki kiate koe, Eteleno ! E kau pati : Ko koe ko loku Atua !

¹⁶ E tuku loku mauli i ou lima : Fakamauli au i oku fili mo latou ala e fakaveliveli mai kiate au !

¹⁷ Fakasa le gigila o ou mata ki lau tagata fakasausau, Fakamauli au i lou kalasia !

¹⁸ Eteleno, ke aua na kau luma mo ka kau fetapa kiate koe ! Kae ke luma le kau agaveli, Ke lotou ifo fakalologo ki le nofoaga o le kau mate !

¹⁹ Ke mate noa a laugutu loi, Ala e masau fia tuu ki le tagata agatonu, Ala e masau matasoka mo fia lasi !

²⁰ Io ! E lasi ai lou agamalie, Leia e ke taofi kia latou ala e i kiate koe, Leia e ke fakasa kia latou ala e afa lolatou mumuniaga iate koe Kae tio a vosa o tagata !

²¹ E ke puipui latou i le malu o ou mata ia latou ala e fakaveliveli kia latou, E ke puipui latou i lou falela i alelo ala e taui ia latou.

²² Ke fakafetai ki le Eteleno ! Talie na fakasa e ia lona kalasia kiate au, O sakinake na kau nofo i se kolo tau.

²³ Na kau pati i loku oso noa : Kua kapu au o mamao i ou mata ! Kae na ke logo ki le leo o aku kole, I le aso leia na kau tagi ai kiate koe.

²⁴ Ke kotou alofa ki le Eteleno, koutou ala e tausi fakaatua ! E taupau e le Eteleno le kau agatonu, Kae tautea e ia latou ala e fia nealasi.

²⁵ Ke kotou loto toa, ti ke fakamakeke okoutou loto, Koutou fuli ala e amanaki malie ki le Eteleno !