Pesalemo 30 - Tosi Tapu

Fakafetai i le oki o le saofaki

¹ Pesalemo. Katiko ki le fakatapu o le fale tapu. A Tavite.

² E kau vikiviki kiate koe, Eteleno, Talie na ke lagai au ki aluga, Na leaise ke loto ke fiafia oku fili iate au.

³ Eteleno, loku Atua ! Na kau tagi kiate koe, ti na ke fakamauli au.

⁴ Eteleno ! Na ke fakatuu ake loku laumalie i le nofoaga o le kau mate, Ti na ke toe tuku ke kau toe mauli o mamao ia latou ala e ifo ki le popoko.

⁵ Ke kotou sua ki le Eteleno, koutou ala e alofa kiate ia ! Ke kotou fakafetai kiate ia, o fakasa lona maokioki !

⁶ Talie e fualoa lona sausau i le kemo o le mata, Kae ko lona kalasia i le mauli katoa. E kaku mai a tagi i le afiafi, Kae i le usu ko le fiafia lasi.

⁷ Na kau pati i loku fimalie : E leaise kau siga loa i se aso !

⁸ Eteleno ! na ke fakamakeke loku mauga i lou alofa… Na ke fufu loa ou mata, ti na kau mamae loa.

⁹ Eteleno ! na kau tagi kiate koe ; Na kau tagi mamae ki le Eteleno :

¹⁰ Kolea e ke maua i le liligi o loku toto, I loku fakaifo ki le popoko ? Pe maua e le efu ni fakafetai kiate koe ? Pe fakamatala e ia lou agatonu ?

¹¹ Fakalogo mai, Eteleno, alofa mai kiate au ! Eteleno, fakamauli au !

¹² Ti na ke fetogi aku tagi ki se fiafia lasi, Na ke tatala loku kofu mamae, kae na ke toi au ki le fiafia,

¹³ O tupu ke sua loku loto kiate koe, kae ke aua na fakalologo. Eteleno, loku Atua ! e kau fakafetai loa kiate koe o lee gato.