Pesalemo 28 - Tosi Tapu

Ko le tali ki le kole

¹ Pesalemo a Tavite. Eteleno, kau tagi kiate koe, Loku utu ! aua na ke taliga tuli mai ki loku leo, O tupu na kau tatau mo latou ala e ifo ki le popoko, Mo ka ke fakamamao kae e leaise ke tali mai kiate au.

² Fakalogo mai ki le leo o aku kole, mo ka kau tagi atu kiate koe, Mo ka kua siki oku lima ki lou sagatualio.

³ Aua na ke ave au mo le kau agaveli ti mo le kau aga fakalialia, Ala e masau ki le tokamalie ki olatou oloi, kae e lotou maua i olatou loto le kaka.

⁴ Ke ke liufaki kia latou o mulimuli ki alatou gaoi, o mulimuli ki le kaka o alatou gaoiaga. Io, liufaki kia latou o mulimuli ki gaoi o olatou lima ; Soli kia latou le totogi e tonu ke lotou maua ia.

⁵ Talie e leaise lotou tokaga ki gaoi a le Eteleno, Ki le gaoiaga o ona lima. Ke maumaui e ia latou ti ke aua na toe lagai e ia latou ki aluga !

⁶ Ke fakafetai ki le Eteleno ! Talie e tali e ia le leo o aku tagi.

⁷ Ko le Eteleno ko loku makeke mo loku paletau. Na fanaki loku loto kiate ia, ti na fakamauli e ia au ; Koia e fiafia lasi ai loku loto, ti e kau fakafetai ai kiate ia i aku sua.

⁸ Ko le Eteleno ko le makeke o lona kakai, Ko le utu o fakamauli o lona filifilia.

⁹ Fakamauli lou kakai ti tapuaki ki lou tofiga ! Liliu ko lolatou tagata tausi ovi mo lolatou fanakiaga o lee gato !