Pesalemo 27 - Tosi Tapu

Ko le malo o le tui

¹ Pesalemo a Tavite. Ko loku malama mo loku fakamauli ko le Eteleno : Ko ai e kau i loa ki ia ? Ko le tokoi o loku mauli ko le Eteleno : kolea e kau tuania loa ki ia ?

² Ka saele mai ni tagata agaveli kiate au, Ke kai loku tino, Ko oku fili mo oku kau fakaveliveli Ala e seke ti siga ki lalo.

³ Kapau e tanaki se kau tau kiate au, E leaise i fua loku loto. Kapau e lagai mai se tau kiate au, E kau apele loa i le fanaki i le nea lena.

⁴ E kau kole ki le Eteleno le nea e tasi, leia e kau oli mamae ki ai : E kau loto ke kau nofo i le fale o le Eteleno i loku mauli katoa, O tio ki le malie o le Eteleno Ti mo afa lona finegalo i lona fale tapu.

⁵ Talie e fufu loa e ia au i lona tapenakulo i le aso o le malaia, E fakamumuni loa e ia au i le potu lilo o lona falela. E fakatuu loa e ia au ki aluga o se utu.

⁶ Ti ko leinei foki, e malaga loku ulu i aluga o oku fili ala e takatakai ia au. E kau momoli loa ni sakilifisio i lona falela, I le tagi o le fakatagi pupusi ; E kau sua loa, e kau fakafetai loa ki le Eteleno.

⁷ Eteleno, logo mai ki loku leo, e kau tagi kiate koe : Alofa mai kiate au, tali mai ki laku kole !

⁸ E pati loku loto iate koe : Kotou afa oku mata ! Koia e kau afa ai ou mata, Eteleno !

⁹ Aua na ke fufu ou mata kiate au, Aua na ke tekei lau tagata fakasausau i lou sausau ! Ko loku tokoi a koe, aua na ke tuku au, aua na ke tiaki au, Ei Atua o loku fakamauli !

¹⁰ Talie e tiaki au e loku tinana mo loku tamana, Kae e too loa au e le Eteleno.

¹¹ Eteleno, ako mai kiate au lou ala, Taki au i le ala o le maoki, O tupu ko oku fili.

¹² Aua na ke tuku au ke faifaitalisa ki ai oku fili, Talie e tutuu mai kiate au ni kau fakamaoki loi Ti mo ni kakai e tukumanava ata ki le agamakeke.

¹³ Io ! Ka na leaise kau iloa pau e kau tio loa ki le agamalie o le Eteleno I le kele o le kakai mauli !…

¹⁴ Ke ke amanaki malie ki le Eteleno ! Ke ke fakamakeke, ti ke fakamakeke lou loto ! Ke ke amanaki malie ki le Eteleno !