Pesalemo 26 - Tosi Tapu

Ko le kole a le tagata agatonu leia e fakavelivelii

¹ Pesalemo a Tavite. Eteleno, fakamaau au i le faitotonu, talie e kau saele i le maoki, E kau fanaki ki le Eteleno, koia e leaise kau siga ai.

² Ke ke tilo au, ei Eteleno, ke ke asiasii au ; Ke ke tuku oku ifiifi mo loku loto ki le kulo saka ukamea !

³ Talie e tuu lou kalasia i mua o oku mata, Ti e kau saele i lou maoki.

⁴ E leaise kau tonatona fakatasi mo le kau faikakaa, Ti e leaise kau ano fakatasi mo le kau malualoi.

⁵ E kau vesia ki le fakatasi a le kau agaveli, Ti e leaise kau tonatona fakatasi mo le kau agasala.

⁶ E kau fanofano oku lima i le mea, Ti e kau ano ki tafa o lou aletale, Eteleno !

⁷ O fakasa aku fakafetai kiate koe, Ti mo fakamatala au gaoi malilie fuli.

⁸ Eteleno, e kau alofa ki le fale leia e ke nofo ai, Ki le ganea leia e agai ai lou kololia.

⁹ Ke aua na ke too loku laumalie mo le kau agasala, Loku mauli mo le kau tagata tukipo,

¹⁰ Ala e tukipo olatou lima, Ti e apele olatou lima atamai i nea alofa !

¹¹ Ko au, e kau saele i le agatonu. Ke ke fakamauli au, ti ke ke alofa mai kiate au !

¹² E tuu makeke loku vae i le maoki : E kau fakafetai loa ki le Eteleno i atu fakatasiga.