Pesalemo 25 - Tosi Tapu

Ko le afa o ala mo le fakamolemole a le Atua

¹ Pesalemo a Tavite. Eteleno ! E kau siki loku laumalie kiate koe.

² Loku Atua ! e kau fanaki kiate koe ; ke aua na ke tuku au ki le luma ! Ke aua na fiafia oku fili iate au !

³ Ko latou fuli ala e amanaki malie kiate koe e leaise luma loa. Io, e luma loa latou ala e leaise agatonu, kae e leai sona tupuaga.

⁴ Eteleno, ke ke fakailo mai kiate au ou ala, Ke ke ako mai kiate au ou ala liliki.

⁵ Ke ke taki au i lou maoki, ti ke ke ako au ; Talie ko le Atua a koe o loku fakamauli, Ko loku amanaki malie a koe o lee gato.

⁶ Eteleno, ke ke manatui lou manava alofa mo lou agamalie ; Talie e la lee gato.

⁷ Ke aua na ke manatui a sala o loku temi tupulaga ti mo aku agasala ; Ke ke manatui au o mulimuli ki lou manava alofa, O tupu ko lou agamalie, ei Eteleno !

⁸ E agamalie ti e agatonu le Eteleno : Koia e fakasa ai e ia le ala ki le tagata agasala.

⁹ E taki e ia le kau agamalu i le faitotonu. E ako e ia lona ala ki le kau agamalu.

¹⁰ Ko ala fuli o le Eteleno e manava alofa ti e agatonu Kia latou ala e tausi ia lana sai mo ana folafola.

¹¹ Eteleno, e ke Atua ! Koia e ke fakamolemole ai ki laku agaveli, talie e lasi ai a ia.

¹² Ko ai le tagata leia e i ki le Eteleno ? E fakasa loa e le Eteleno kiate ia le ala leia e tonu ke filifili e ia.

¹³ E malolo loa lona laumalie i le manuia, Ti e maua loa e lona sakoga le fenua.

¹⁴ E tuku e le Eteleno lona finegalo fufu kia latou ala e i kiate ia, Ti e fakasa e ia kia latou lana sai.

¹⁵ E kau tuku tuumau oku mata ki le Eteleno, Talie e fakamavae loa e ia oku vae i le kupega.

¹⁶ Ke ke tio mai kiate au, ti ke ke alofa mai kiate au, Talie kua tiaki au ti e kau mamae.

¹⁷ Kua asilisili a mamae o loku loto ; Ke ke fakamauli au i loku mamae.

¹⁸ Ke ke tio ki loku malaia mo loku pakia, Ti ke ke fakamolemole ki aku agasala fuli.

¹⁹ Ke ke tio ki le toka api o oku fili, Ti mo le lasi o lolatou vesia kiate au.

²⁰ Ke ke taupau loku laumalie, ti ke ke fakamauli au ! Ke aua na kau luma, Mo ka kau afa iate koe loku mumuniaga !

²¹ Ke puipui au e le saosaoa mo le agatonu, Talie e kau tuku laku amanaki malie kiate koe !

²² Ei Atua ! fakamauli Iselaele I ona mamae fuli !