Pesalemo 22 - Tosi Tapu

Mamae mo le kololia o le Fakamauli

¹ Ki le pule o le kau sua. Ke sua i le nota o le tia o le mafoata. Pesalemo a Tavite.

² Loku Atua ! loku Atua ! kolea kua ke tiaki ai au ? Kolea e ke fakamamao ai kae e leaise ke fakamauli au, ti e leaise ke logo ai ki aku tagi ?

³ Loku Atua ! e kau tagi i le ao, kae e leaise ke logo ; I le pouli, e leaise kau maua fua se malolo.

⁴ Kae ko le Maokioki a koe, E ke nofo i loto malie o fakafetai a Iselaele.

⁵ Na fanaki omatou tamana kiate koe ; Io, na lotou fanaki kiate koe, ti na ke saofaki latou.

⁶ Na lotou tagi kiate koe, ti na ke fakamauli latou ; Na lotou fanaki kiate koe, ti na leaise lotou luma.

⁷ Kae ko au, ko se kelemutu au, e leaise ko se tagata, Ko le nea gologolo au a tagata, ti ko le tagata vesiainai au a le kakai.

⁸ Ko latou fuli ala e tio kiate au e gologolo kiate au, E lotou fakainaina olatou gutu, mo kalokalo olatou ulu, o pati :

⁹ Na fanaki a ia ki le Eteleno ! Tuku ke fakamauli a ia e le Eteleno ! E fakamauli loa a ia e le Eteleno, mo ka e alofa a ia kiate ia !

¹⁰ Io, na ke too au i le manava o loku tinana, Na ke tuku au ki u o loku tinana i le fimalie ;

¹¹ Talu mei le manava o loku tinana, na ke taupau au ; Talu mei le manava o loku tinana, na ke liliu ko loku Atua.

¹² Aua na ke fakamamao iate au mo ka ofi mai le mamae, Mo ka e leaise au se tasi o tokoi mai kiate au !

¹³ E takatakai au e ni kau pipi tagata lalasi, E takatakai au e ni kau ni pipi tagata o Pasani.

¹⁴ E lotou fakamaga mai olatou gutu kiate au, Ofaipe le laione leia e sae ti gugulu.

¹⁵ E kau faipe se vai leia e sali, Ti e mavete oku ivi fuli ; E fai loku mafu le fa silo, E okioki a ia i oku tootooga.

¹⁶ E malo loku makeke ofaipe le kele kula, Ti e pipiki loku alelo ki loku gutu ; E ke tuku au ki le efu o le mate.

¹⁷ Talie e takatakai au e ni kuli, E mumui se kau kaia i oku tafa, E lotou sokai oku lima mo oku vae.

¹⁸ E feala ke kau lau oku ivi fuli. Ko latou, e lotou leoleo au, e lotou tio mai kiate au.

¹⁹ E lotou vae oku kofu ia latou, E lotou toso pe ko ai ka maua ia loku taupulupulu.

²⁰ Kae ko koe, Eteleno, aua na ke fakamamao iate au ! Ko koe leia ko loku makekeaga, ke ke au vave o saofaki au !

²¹ Ke ke puipui loku laumalie i le seleta, Mo loku mauli i le pule o ni kuli !

²² Ke ke fakamau au i le gutu o le laione, Ke ke saofaki au i tala o le pipi vao !

²³ E kau fakasa loa lou suafa ki oku fetaina, E kau vikiviki loa kiate koe i le fakatasiga.

²⁴ Ko koutou ala e i ki le Eteleno, ke kotou vikiviki kiate ia ! Ko koutou fuli ko le sakoga o Sakopo, ke kotou fakakololia kiate ia ! Ke kotou lulu i ona mua, kotou fuli ko le sakoga o Iselaele !

²⁵ Talie e leaise vesia a ia pe fakanoai e ia a mamae o leia e mamae, Ti e leaise fufu e ia ona mata kiate ia. Kae e fakalogo a ia kiate ia mo ka tagi a ia kiate ia.

²⁶ E ke liliu loa ko le tupuaga o aku fakafetai i le fakatasi lasi. E kau fakasoko loa aku fakapapau i mua o latou ala e i kiate koe.

²⁷ E kai loa le kau mativa ti e lotou makokona loa, Ko latou ala e afa ia le Eteleno e fakafetai loa kiate ia. Ke mauli okoutou laumalie o lee gato !

²⁸ E manatu loa potupotu fuli o le malama nei ki le Eteleno, ti e lotou tafoki loa kiate ia. E punou loa famili fuli o atu puleaga i ou mua.

²⁹ Talie maua e le Eteleno le pule : E pule a ia ki atu puleaga.

³⁰ E kai loa le kau makeke fuli o le malama nei, ti e lotou punou loa ki lalo. E punou loa i ona mua latou fuli ala e ifo ki le efu, Latou ala e leaise feala ke taupau ia olatou mauli.

³¹ E tausi loa le sakoga kiate ia ; E masau loa ki le Aliki i le tautupu muli.

³² Ka au loa a ia, e fakasa loa e ia lona faitotonu, E fakasa loa e ia lana gaoiaga ki le kakai tupu foou.