Pesalemo 21 - Tosi Tapu

Fakafetai a le sau

¹ Ki le pule o le kau sua. Pesalemo a Tavite.

² Eteleno ! E fiafia le sau, o tupu ko lau puipui makeke. Io, e apele a ia i le fiafia, o tupu ko lou fakamauli !

³ Na ke soli kiate ia le nea leia na oli ki ai lona loto, Ti na leaise ke fakafiti le kole o ona laugutu. - Manava.

⁴ Talie na ke tokoi kiate ia i tapuakina o lou kalasia, Ti na ke teki ki lona ulu se pala aulo mea.

⁵ Na kole atu e ia kiate koe le mauli, ti na ke soli a ia kiate ia, Io, se mauli fualoa ki le lee gato o lee gato.

⁶ E lasi lona kololia o tupu ko lou tokoi ; E ke teki kiate ia le gigila mo le fulumalie.

⁷ E ke fakaliliu a ia o asilisili manuia o lee gato, E ke fakaapele a ia i le fiafia i ou mua.

⁸ E fanaki le sau ki le Eteleno ; Ti e leaise siga a ia, o tupu ko le agamalie o le Taualuga.

⁹ E tapo loa e lou lima ou fili fuli, E tapo loa e lou lima atamai latou ala e vesia kiate koe.

¹⁰ E ke fakaliliu loa latou ofaipe se gutuumu kaka, I le aso leia e ke fakasa ai loa a koe. E maumaui loa latou e le Eteleno i lona sausau, Ti e tutu loa latou e le afi.

¹¹ E ke fakapuli loa lolatou sakoga i le malama nei, Ti mo lolatou lanu i loto malie o vosa o tagata.

¹² Na lotou fakakaukaui le veli kiate au, Na lotou fakatupu ni fakatuutuu veveli, kae e leaise lotou mafai ia loa se nea fua.

¹³ Talie e ke fakatitua loa latou, Ti e ke fafao loa lau kalolo o fana latou.

¹⁴ Ke ke tuu ki aluga, Eteleno, mo lou makeke ! E motou fia sua, ti mo fakamalo ki lou mafimafi.