Pesalemo 20 - Tosi Tapu

Kole o uiga mo le sau

¹ Ki le pule o le kau sua. Pesalemo a Tavite.

² Ke tali a koe e le Eteleno i le aso o le mamae ! Ke puipui a koe e le suafa o le Atua o Sakopo !

³ Ke kakau mai e ia mei le sagatualio le fakamauli kiate koe ! Ke tokoi a ia kiate koe mei Sione !

⁴ Ke manatui e ia au moliga fuli, Ti ke tali e ia au failaulau ! - Manava.

⁵ Ke soli atu e ia kiate koe le nea leia e oli ki ai lou loto, Ti ke fakasoko e ia au fakaamu fuli !

⁶ E motou fiafia loa i lou fakamauli, E motou toso loa le manumanu i le suafa o lomatou Atua ; E tali loa e le Eteleno au kole fuli.

⁷ Ko leinei, e kau iloa e saofaki loa e le Eteleno lona filifilia ; E tali loa e ia lana kole mei lagi, mei lona nofoaga maokioki, Ki le tokoi makeke o lona lima atamai.

⁸ E fanaki latou anei ki alatou saliote, ti ko latou ala ki alatou osi ; Kae ko matou, e motou too le suafa o le Eteleno, lomatou Atua.

⁹ Ko latou, e lotou mapelu ki lalo, ti e lotou sisiga ; Ko matou, e motou tuu makeke, ti e motou tutuu i aluga.

¹⁰ Eteleno, fakamauli le sau ! Ke tali e ia matou, mo ka motou fetapa kiate ia !