Pesalemo 2 - Tosi Tapu

Ko le pule o Kilisito

¹ Kolea le logoa lena i atu puleaga, Mo manatu vaiga ana i atu kakai ?

² Kolea kua malaga ai ki aluga a sau o le malama nei, Ti kua kau ai a pule mo latou, O agatuu ki le Eteleno mo lona mesia ?

³ Ke tou motusi alatou sai, Ti ke tou tiaki olatou tini ki mamao !

⁴ Ko leia e eke i le atu lagi e kata, Ti e gologolo le Aliki kia latou.

⁵ Ti e folafola a ia kia latou i lona ita, Ti e fakamamae e ia latou i lona sausau lasi :

⁶ Ko au leia na pani lolo ia loku sau, I Sione, loku mauga maokioki !

⁷ E kau fakasa loa le fono ; Na pati mai le Eteleno kiate au : Ko loku alo a koe ! Na kau fakatupu a koe i le aso nei.

⁸ Kole mai kiate au ti e kau soli atu loa kiate koe a atu puleaga ko lou tofiga, Mo potupotu o le kele ma au.

⁹ E ke fatifatii loa latou ki se tokotoko ukamea, E ke fatifatii loa latou ofaipe le ipu a se tagata faiipu.

¹⁰ Ti ko leinei, kau sau, ke kotou takitaki i le poto ! Kau tui fakamaau o le malama nei, ke kotou tali aku akonaki !

¹¹ Ke kotou tausi ki le Eteleno i le i, Ti ke kotou fiafia i le lulu.

¹² Ke kotou sogi ki le Alo, talie na ita a ia, Kae kotou mamate loa i lokoutou ala, Talie e ula vave lona ita. Manuia latou fuli ala e fanaki kiate ia !