Pesalemo 19 - Tosi Tapu

Gaoi mo le folafola a le Atua

¹ Ki le pule o le kau sua. Pesalemo a Tavite.

² E fakamatala e le lagi le kololia o le Atua, Ti e fakasa e le malama nei le gaoiaga o ona lima.

³ E ako latou e le aso ki se tasi ake aso, Ti e fakasa latou e le pouli ki se tasi ake pouli.

⁴ E leaise ko se masau, e leaise ko ni kupu Ala e leaise feala ke logo ki ai :

⁵ E taka lalatou akonaki i le malama nei katoa. E ano lolatou leo o kaku ki potupotu o le malama nei, Leia na fakatuu ai e ia se falela ki le laa.

⁶ Ti ko le laa, o tatau mo se tama avaga leia e ulu mei lona kogafale, E makape i le malae fai manogi i le fiafia o se tagata malo :

⁷ E malaga ake a ia i le tasi potupotu o le lagi, Ti e fakaoki e ia lana makape i leia ake potupotu o le lagi : E leaise lilo se nea fua e tasi i lona mafana.

⁸ E saosaoa le lao a le Eteleno, e fakafoou e ia le laumalie. E maoki le fakamaoki a le Eteleno, e tuku e ia le poto ki le vale.

⁹ E totonu fakatotonu a le Eteleno, e lotou fakafiafia ia le loto. E mea lao a le Eteleno, e lotou fakamalama ia a mata.

¹⁰ E mea le i ki le Eteleno, e tuu a ia o lee gato. E maoki fakamaau a le Eteleno, e lotou totonu fuli.

¹¹ E lotou mauiga ake i le aulo, io, i le aulo mea lasi ; E lotou sua malie ake i le meli, io, i le meli leia e sali mei laui meli.

¹² E ako foki e lau tagata fakasausau a nea ana ; E lasi le fakapale o leia e tausi ia latou.

¹³ Ko ai e iloa ia ona sese ? Fakamolemole mai kiate au ala e leaise kau iloa.

¹⁴ Ke ke puipui foki lau tagata fakasausau i le kau fia nealasi, Ke aua na lotou pule kiate au ! Ti e kau agatonu loa, o mea i agasala lalasi.

¹⁵ Ke ke tali masau o loku gutu Ti mo manatu o loku loto, Ei Eteleno, loku utu mo loku fakamauli !