Pesalemo 18 - Tosi Tapu

Fakavikiviki i le oki o le saofaki

¹ Ki le pule o le kau sua. Pesalemo a le tagata fakasausau a le Eteleno, ko Tavite, leia na fai ia ki le Eteleno a kupu o le katiko leinei, i lona fakamauli e le Eteleno i le lima o ona fili fuli, mo le lima o Saulo. Na pati a ia :

² E kau alofa kiate koe, Eteleno, loku makeke !

³ Eteleno, loku utu, loku kolo tau, loku fakamauli ! Loku Atua, loku utu, leia e kau maua ai se mumuniaga ! Loku paletau, le makeke leia e fakamauli ia au, loku maloloaga taualuga !

⁴ E kau kalaga : Ke fakavikiviki ki le Eteleno ! Ti e saofaki au i oku fili.

⁵ Na takatakai au e va o le mate, Ti na fakaii kiate au a liua o le maumau ;

⁶ Na fui au e va o le nofoaga o le kau mate, Na mauatoka au e kupega o le mate.

⁷ I loku mamae na kau fetapa ki le Eteleno, na kau tagi ki loku Atua : Mei lona fale sau, na logo a ia ki loku leo, Ti na kaku laku tagi ki ona mua, ki ona taliga.

⁸ Na lui loa le malama nei ti na lulu loa a ia. Na galulu loa a tafito o mauga, Ti na lotou sisiga loa, talie na ita le Eteleno.

⁹ Na mafuta se afu i ona pogoisu, Ti na ulu mai se afi kaka mei lona gutu : Na mapusipusi mei ai ni malala kaka.

¹⁰ Na tuku loa e ia ki lalo le lagi, ti na ifo mai loa a ia : Na i ai se ao matotolu i lalo o ona vae.

¹¹ Na eke a ia i se selupino ti na lele a ia : Na lele a ia i kapakau o le matagi.

¹² Na fai e ia ki le fakapouli lona nofoaga fakalilo, lona falela i lona takatakai. Na kofu a ia e ni vai fakapouli mo ni ao uuli.

¹³ I le ao gigila leia na ano i ona mua, na mavae ai ni ao, O laku se ua aisi, mo ni malala kaka.

¹⁴ Na mana loa le Eteleno i le lagi, Na fakagugulu loa e le Taualuga lona leo, O fakatasi mo se ua aisi ti mo ni malala kaka.

¹⁵ Na fana loa e ia ana gasau, ti na veteki loa e ia oku fili, Na liuliuga loa e ia a fatuliki, ti lotou sosola loa.

¹⁶ Na sa loa le takele o liua, Na sa loa ki aluga a tafito o le malama nei, I lou sausau, Eteleno ! I le logoa o le matagi o ou pogoisu.

¹⁷ Na falo loa e ia lona lima mei aluga, o too au, Io, na too loa e ia au i vai lalasi.

¹⁸ Na saofaki loa e ia au i loku fili makeke, I oku fili ala na makeke ake iate au.

¹⁹ Na lotou mauatoka au i le aso o loku mamae ; Kae na tokoi loa le Eteleno kiate au.

²⁰ Na tuku loa e ia au ki le lau lasiga, Na fakamauli e ia au, talie e alofa a ia kiate au.

²¹ Na totogi e le Eteleno kiate au o mulimuli ki loku agatonu, Ti na liufaki e ia kiate au o mulimuli ki le mea o oku lima ;

²² Talie na kau tausi a ala o le Eteleno, Ti na leaise kau agasala ki loku Atua.

²³ Na tuu ana fakatotonu fuli i oku mua, Ti na leaise kau fakamamao fua i ana lao.

²⁴ Na kau lee mele i ona mua, Ti na kau tokaga ki le agaveli.

²⁵ Koia na liufaki ai e le Eteleno kiate au o mulimuli ki loku agatonu, O mulimuli ki le mea o oku lima i ona mua.

²⁶ Ki leia e agamalie e ke fakasa lou agamalie. Ki le tagata agatonu e ke fai o mulimuli ki lona agatonu.

²⁷ Ki leia e mea e ke fakasa lou mea, Ki leia e agatuu e ke fai o mulimuli ki lana agatuu.

²⁸ E ke fakamauli le kakai leia e fakataulalo, Ti e ke tuku ki lalo a mata fia nealasi.

²⁹ Io, e ke fakamu loku malama ; Eteleno, loku Atua, fakamalama oku pouli.

³⁰ Mo koe, e kau oso ki se kau tau kua tuu mo alatou masafu ; Mo loku Atua, e kau sopo i se kaua taualuga.

³¹ E malie tukupau a ala o le Atua, Kua asiasii le folafola a le Eteleno. Ko se paletau a ia kia latou fuli e fanaki kiate ia.

³² Talie ko ai e Atua, pe leaise ko le Eteleno ? Ti ko ai ko se utu, pe leaise ko lotatou Atua ?

³³ Ko le Atua leia e toi ia kiate au le kilipipi o le makeke, Ti e taki ia au i le ala totonu.

³⁴ E fakaliliu e ia oku vae ke tatau mo vae o tia ; E fakatuu e ia au i oku potu taualuga.

³⁵ E fakamakeke e ia oku lima ki le tau, Ti e fafao e oku lima le kalolo sila.

³⁶ E ke soli mai kiate au le paletau o lou fakamauli, E taofi au e lou lima atamai, Ti e kau liliu o lasi i lou agamalie.

³⁷ E ke fakalaulasi le ala i o oku lakaaga, Koia na leaise seke ai oku vae.

³⁸ E kau tuli oku fili, e kau maua latou, Ti e leaise kau toe liliu kae e leikiaise kau tamate fuli latou.

³⁹ E kau fatifatii latou, ti e leaise mafai ke lotou toe tuu ki aluga ; E lotou vivilo ki lalo i oku vae.

⁴⁰ E ke toi kiate au le makeke ki le tau, E ke peluki ki lalo oku fili i oku mua.

⁴¹ E ke fakasosola oku fili i oku mua, Ti e kau tapono a gutu o latou ala e vesia kiate au.

⁴² E lotou tagi, kae e leaise tasi leia ke fakamauli ia latou ! E lotou tagi ki le Eteleno, kae e leaise tali a ia kia latou !

⁴³ E kau gugu latou ofaipe le efu leia e ave e le matagi. E kau takatakafi latou ofaipe le pela o le ala.

⁴⁴ E ke saofaki au i visi o le kakai ; E ke tuku au ki le ulu o atu puleaga. E tausi kiate au se kakai leia na leaise kau iloa.

⁴⁵ E lotou fakalogo kiate au i laku uluaki fakatotonu, E fakalapulapu kiate au a vosa o le matapule.

⁴⁶ E puli le makeke o vosa o le matapule, E lotou lulu i fafo o olatou kolo tau.

⁴⁷ E mauli le Eteleno, ti ke fakafetai ki loku utu ! Ke siki ki aluga le Atua o loku fakamauli,

⁴⁸ Le Atua leia e tuku ia kiate au le taui, Leia e fakapopula ia a puleaga kiate au,

⁴⁹ Leia na saofaki ia au i oku fili ! E ke siki au ki aluga o oku fili, E ke saofaki au i tagata agamakeke.

⁵⁰ Koia e kau fakafetai ai loa kiate koe i loto malie o atu puleaga, Eteleno ! Ti e kau sua loa le kololia o lou suafa.

⁵¹ E tuku e ia ni fakamauli lalasi ki lana sau, Ti e fakasa e ia lona manava alofa ki lana filifilia, Kia Tavite, mo lona sakoga, o lee gato.