Pesalemo 17 - Tosi Tapu

Kole a le tagata agatonu leia e fakavelivelii

¹ Kole a Tavite. Eteleno ! fakalogo mai ki loku agatonu, tokaga mai ki aku tagi, Fakalogo mai lou taliga ki laku kole leia e fai atu i ni laugutu mea !

² Ke sa loku faitotonu i ou mua, Ke tio ou mata ki loku agatonu !

³ Kapau e ke tilo loku loto, kapau e ke asiasi ki ai i le pouli, Kapau e ke asiasii au, e leaise ke maua loa se nea : E leaise kese laku manatu i le nea leia e vilo mei loku gutu.

⁴ I le tio ki gaoi a tagata, e kau agatonu ki le folafola o ou laugutu, Ti e kau tokaga ki le ala o le kau agamakeke.

⁵ E tuu makeke oku lakaaga i ou ala, E leaise siga oku vae.

⁶ Ei Atua, e kau fetapa kiate koe, talie e ke tali mai kiate au ! Fakalogo mai lou taliga ki laku masau !

⁷ Fakasa lou agamalie, a koe leia e fakamauli ia latou ala e afa ia se mumuniaga, Ti e fakamauli ia latou ki lou lima atamai i olatou fili !

⁸ Taupau au ofaipe le fa tiloga o le mata ; Puipui au, i le malu o ou kapakau,

⁹ I le kau agaveli leia e fakaveliveli mai kiate au, I oku fili tukipo ala e takatakai ia au.

¹⁰ E lotou tapono olatou tootooga, E lotou maua i olatou gutu ni masau fia nealasi.

¹¹ E lotou au i omatou muli, ti ko leinei e lotou takatakai matou : E lotou lamalama le temi ke tekai ai matou ki le kele.

¹² E lotou faipe se laione leia kua mate i le fia kai, Pe se uviki laione leia e talitali ki sana nea kai i lona mumuniaga.

¹³ Eteleno, ke ke tuu ki aluga, ke ke saele kiate ia, ke ke peesi a ia ki lalo ! Saofaki au mei le tagata agaveli ki lau seleta !

¹⁴ Eteleno, saofaki au i tagata ki lou lima, i tagata o le malama nei, Ala kua maua lolatou vaega i le mauli, Ti kua ke fakaapele olatou manava ki ou koloa. E makokona olatou fanau, Ti e lotou tuku le tupu olatou koloa ki olatou makopuna.

¹⁵ Kae ko au, i lou faitotonu, e kau tio loa ki ou mata ; I le ala ake, e kau makona loa i lou paaki.