Pesalemo 16 - Tosi Tapu

Fakapale o le tagata faitotonu

¹ Sua mauiga a Tavite. Ei Atua, Taupau au ! talie e kau afa iate koe loku mumuniaga.

² E kau pati ki le Eteleno : Ko loku Aliki a koe, Ko loku koloa lasi a koe !

³ Kae ko le kau sagato leia e nonofo i le fenua Mo le kau agatonu, ko le tauaga latou o loku alofa katoa.

⁴ E liuliuga a taulaatua, e makape i muli o atua matapule : E leaise kau liligi alatou lipasio toto, E leaise kau too olatou igoa i oku laugutu.

⁵ Ko le Eteleno ko loku inati mo loku kalise. Ko koe leia e taupau kiate au loku vaega.

⁶ Kua vae mai kiate au se tofiga malie, Kua tuku mai kiate au se potu fulumalie.

⁷ E kau fakafetai ki le Eteleno, loku tokoi ; I le pouli foki, e fakamakeke au e loku loto.

⁸ E kau maua tuumau le Eteleno i oku mua. Ka nofo a ia i loku fetuu atamai, e leaise kau siga.

⁹ Koia e fiafia ai loku loto, ti e nekenekea loku laumalie, Ti e malolo loku tino i le fimalie.

¹⁰ Talie e leaise ke tuku loa loku laumalie ki le nofoaga o le kau mate, Ti e leaise ke fakataga loa ke tio lou alofaaga ki le pala.

¹¹ E ke fakasa mai loa kiate au le ala o le mauli ; E i ai ni fiafia lasi i ou mua, Ni nea malilie lee gato i lou lima atamai.