Pesalemo 148 - Tosi Tapu

Fakafetai a le malama nei

¹ Kotou fakafetai ki le Eteleno ! Kotou fakafetai ki le Eteleno i aluga o atu lagi ! Kotou fakafetai kiate ia i potu taualuga !

² Kotou fakafetai kiate ia, koutou, ko ana aselo fuli ! Kotou fakafetai kiate ia, koutou, ko ana kau tau fuli !

³ Kolua fakafetai kiate ia, laa mo masina ! Kotou fakafetai kiate ia, koutou fuli, ko fetuu gigila !

⁴ Kotou fakafetai kiate ia, atu lagi o atu lagi, Ti mo koutou, ko atu vai ala i aluga o atu lagi !

⁵ Ke lotou fakafetai ki le suafa o le Eteleno ! Talie na fakatotonu e ia, ti na fakatupu latou.

⁶ Na fakamakeke e ia latou o lee gato i tautupu mo tautupu ; Na tuku e ia ni lao, ti e leaise maumaui loa e ia latou.

⁷ Kotou fakafetai ki le Eteleno, mei lalo o le kele, Manu lalasi o le tai, mo koutou fuli, ko vanu loloto,

⁸ Afi mo ua fefeka, nive mo kokofu, Matagi makeke, ala e fai ia ana fakatotonu,

⁹ Mauga mo mauga liliki fuli, Laakau fua fuli ti mo sete fuli,

¹⁰ Manu sesegi mo manu lalata fuli, Manu totolo mo manu lele,

¹¹ Sau o le malama nei ti mo kakai fuli Pule mo tui fakamaau fuli o le malama nei,

¹² Tamaliki tupulaga mo taineliki, Matua mo toe liliki !

¹³ Ke lotou fakafetai ki le suafa o le Eteleno ! Talie e taualuga toka tasi lona suafa ; E taualuga lona agai i le kele mo atu lagi.

¹⁴ Na toe lagai e ia le makeke o lona kakai : Koia e fakafetai ai kiate ia lona kakai agatonu katoa, A fanau a Iselaele, le kakai leia e nofo i ona tafa. Kotou fakafetai ki le Eteleno !