Pesalemo 145 - Tosi Tapu

Sua ki le mafimafi mo le agamalie o le Atua

¹ Fakafetai. A Tavite. E kau siki loa a koe, ei loku Atua, loku sau ! Ti e kau fakafetai loa ki lou suafa i temi fuli, o lee gato.

² I aso fuli e kau fakafetai loa kiate koe, Ti e kau fakamalo loa ki lou suafa i temi fuli, o lee gato.

³ E lasi le Eteleno, ti e gali a ia i le fakafetai, Ti e leaise mafai ke iloa lona lasi.

⁴ Ke fakafetai a tautupu fuli ki au gaoi, Ti ke lotou fakasa au gaoi lalasi !

⁵ E kau fakasa loa le kololia lasi o lou agai ; E kau sua loa au gaoi fulumalilie.

⁶ E masau loa ki lou makeke fakaii, Ti e kau fakamatala loa lou lasi.

⁷ Ke fakasa le fakamanatu o lou agamalie lasi, Ti ke sua lou faitotonu !

⁸ E manava alofa le Eteleno, ti e apele a ia i le loto alofa ; E taofi fualoa e ia lona ita, ti e apele a ia i le agamalie.

⁹ E agamalie le Eteleno ki tagata fuli, Ti e mafola lona manava alofa ki ana gaoiaga fuli.

¹⁰ E fakafetai loa kiate koe au gaoiaga fuli, ei Eteleno ! Ti e tapuaki loa kiate koe lau kau agatonu.

¹¹ E lotou fakasa loa le kololia o lau pule, Ti e lotou fakasa loa lou mafimafi,

¹² O tupu ke e iloa e vosa o tagata lou mafimafi Ti mo le kololia lasi o lau pule.

¹³ Ko lau pule ko se pule i sekulo fuli, Ko lou makeke e lau i tautupu fuli.

¹⁴ E tokoi e le Eteleno latou fuli ala e sisiga, Ti e toe fakatuu e ia latou fuli ala e mapelu ki lalo.

¹⁵ E amanaki malie kiate koe a mata o tagata fuli, Ti e ke soli kia latou le nea kai i lona temi.

¹⁶ E ke fakamavaa lou lima, Ti e ke fagai o makokona a nea fuli ala e maua ia le mauli.

¹⁷ E faitotonu le Eteleno i ona ala fuli, Ti e manava alofa a ia i ana gaoi fuli.

¹⁸ E ofi le Eteleno kia latou fuli ala e fetapa kiate ia, Kia latou fuli ala e fetapa kiate ia i le maoki.

¹⁹ E fakasoko e ia a oli o latou ala e i kiate ia ; E logo a ia ki alatou tagi, ti e fakamauli e ia latou.

²⁰ E taupau e le Eteleno latou fuli ala e alofa kiate ia, Kae e maumaui e ia a tagata agaveveli fuli.

²¹ Ke fakasa e loku gutu le fakafetai o le Eteleno, Ti ke tapuaki tagata fuli ki lona suafa maokioki, I temi fuli o lee gato !