Pesalemo 144 - Tosi Tapu

Kole ki le fakalauatea o le kakai

¹ A Tavite. Ke fakafetai ki le Eteleno, loku utu, Leia e ako ia oku lima ki le tau, Oku maikao ki le velo,

² Mo loku malieaga mo loku kolo tau, Ko loku maloloaga taualuga mo loku fakamauli, Ko loku paletau, leia ko loku ulufaga, Leia na tuku ia kiate au loku kakai !

³ Eteleno, kolea le tagata, ke ke iloa a ia ? Le vosa o le tagata, ke ke tokaga ai kiate ia ?

⁴ E tatau le tagata mo se tukumanava, Ti e tatau ona aso mo le malu leia e mole.

⁵ Eteleno, tuku ki lalo lou atu lagi, ti ke ifo mai ! Fafa ki mauga, ti ke lotou kokofu !

⁶ Fakatapa a uila, ti ke fakamavete oku fili ! Fana au gasau, ti ke lotou sosola !

⁷ Falo mai ou lima mei aluga ; Saofaki au, ti ke fakamauli au i atu vai lalasi, I le lima o vosa o le matapule,

⁸ Leia e masau lona gutu i le loi, Ti ko lona lima atamai ko se lima atamai kaka.

⁹ Ei Atua ! e kau sua loa kiate koe se katiko foou, E kau fakamalo loa kiate koe i le lute va kau agafulu.

¹⁰ Ko koe, leia e soli ia le fakamauli ki sau, Leia na fakamauli ia loa i le seleta tukipo Tavite, lau tagata fakasausau,

¹¹ Saofaki au ti ke fakamauli au i le lima o vosa o le matapule, Leia e masau lona gutu i le loi, Ti ko lona lima atamai ko se lima atamai kaka !…

¹² E fai omatou vosa pe ni laakau, Ala e tutupu i lolatou tupulaga ; E fai omatou taineliki pe ni pou na togi fakateuteu, Ala e teu ia a fale sau.

¹³ E apelepele omatou fale tanaki magiti i magiti kesekese ; E liuliuga amatou kau manu, o lau i afe, mo kau agafulu afe, I omatou aloalo fenua.

¹⁴ E fanaunau amatou kau pipi fafine muli ; E leai se maumau, e leai se popula, E leai se tagi i omatou ala !

¹⁵ Manuia le kakai leia e fenaaki ! Manuia le kakai leia e Atua ki le Eteleno !