Pesalemo 143 - Tosi Tapu

Kole ki le saofaki

¹ Pesalemo a Tavite. Eteleno, fakalogo mai ki laku kole, tokaga mai lou taliga ki aku tagi ! Tali mai kiate au i lou agatonu, i lou faitotonu !

² Aua na ke fakamaaui lau tagata fakasausau ! Talie e leaise agatonu se tagata mauli i ou mua.

³ E tuli e le fili loku laumalie, E takatakafi e ia ki le kele loku mauli : E fakanofo e ia au i le fakapouli, Ofaipe latou ala kua mate talu mei fualoa.

⁴ E gaegae loku laumalie iate au, E mamae loku loto i loku manava.

⁵ E kau manatu ki aso o le temi mua, E kau metitasio ki au gaoi fuli, E kau fakakaukau ki le gaoiaga o ou lima.

⁶ E kau falo oku lima kiate koe ; E oli lasi loku laumalie kiate koe, Ofaipe se kele malo. - Manava.

⁷ Ke ke vave o tali mai kiate au, ei Eteleno ! E okioki loku laumalie. Aua na ke fufu mai kiate au ou mata ! E kau tatau loa mo latou ala e ifo ki le popoko.

⁸ Tuku ke kau logo i le usu ki lou agamalie, Talie e kau fanaki kiate koe. Fakasa mai kiate au le ala leia e tonu ke kau saele ai, Talie e kau siki kiate koe loku laumalie.

⁹ Ei Eteleno ! saofaki au i oku fili, Talie e kau afa iate koe se mumuniaga.

¹⁰ Ako mai kiate au le fai o lou finegalo, Talie ko koe ko loku Atua. Ke taki au e lou laumalie malie i le ala totonu !

¹¹ O tupu ko lou suafa, Eteleno, toe soli mai le mauli kiate au ! I lou faitotonu, too loku laumalie i le mamae !

¹² I lou agamalie, tapono le gutu o oku fili, Tamate latou fuli ala e fakaveliveli ki loku laumalie ! Talie ko au ko lau tagata fakasausau.