Pesalemo 141 - Tosi Tapu

Kole ke saofaki i tagata agamakeke

¹ Pesalemo a Tavite. Eteleno, e kau kalaga kiate koe : Au vave ki oku tafa ! Fakalogo mai lou taliga ki loku leo, mo ka kau kalaga kiate koe !

² Ke fai laku kole i ou mua pe le iseso, Ti ke fai oku lima ala e falo atu kiate koe pe le moliga o le afiafi !

³ Eteleno, fakatuu se kau leo i loku gutu, Leoleo le matapa o oku laugutu !

⁴ Aua na ke tuku ke toso loku loto ki ni nea veveli, Ki ni gaoi veveli mo latou ala e fai ia le veli, Ti ke aua na kau kai fua i alatou kaitasi !

⁵ Ke taai au e le tagata agatonu, ko se kalasia a ia ; Ke tautea e ia au, ko se lolo a ia i loku ulu : E leaise mafuli kese loa loku ulu ; Kae e toe pale atu loa laku kole kiate koe o tupu ko le kau agaveli.

⁶ Ke laku olatou tui fakamaau mei aluga o utu, Ti e fakalogo mai loa ki aku masau, talie e lotou logo malie.

⁷ Ofaipe se mafaa e sa i le kele, E fakamavaa loa e le nofoaga o le kau mate lona gutu, O folo olatou ivi ala kua mavetevete.

⁸ Eteleno, Aliki, ko koe leia e mafuli ki ai oku mata, Ti ko ou tafa ala e kau afa ai se mumuniaga : Aua na ke tiaki loku laumalie !

⁹ Puipui au i le masele leia e lotou teuteu kiate au, Ti mo pikoi a latou ala e fai ia le veli !

¹⁰ Ke vilo le kau agaveli ki alatou kupega, Kae ke kau sao ia latou i le temi a ia !