Pesalemo 140 - Tosi Tapu

Kole ke puipui i tagata agaveli

¹ Ki le pule o le kau sua. Pesalemo a Tavite.

² Eteleno, saofaki au i tagata agaveli ! Puipui au i tagata agamakeke,

³ Ala e fakakaukau ia ni fakatuutuu veveli i olatou loto, Ti e fakatasi tuumau ke tau !

⁴ E lotou fakamatakakai olatou alelo ofaipe se gata, E lotou maua i olatou laugutu le vai kona o le gata velo. - Manava.

⁵ Eteleno, malui au i lima o le tagata agaveli ! Puipui au i tagata agamakeke, ala e fakakaukau ke tamate au !

⁶ E teuteu e ni tagata fia nealasi se masele mo ni kupega kiate au, E lotou fakatuu ni kukuti i le ala, E lotou kenu ni popoko ke kau vilo ki ai. - Manava.

⁷ E kau pati ki le Eteleno : Ko koe ko loku Atua ! Eteleno, fakalogo mai lou taliga ki aku tagi !

⁸ Eteleno, Aliki, ko le makeke a koe o loku fakamauli ! E ke malui loku ulu i le aso o le tau.

⁹ Eteleno, aua na ke fakasoko a oli a le tagata agaveli ; Aua na ke tuku ke fai ana fakatuutuu, Ke aua na fakakololia a ia ! - Manava.

¹⁰ Ke vilo ki ulu o latou ala e takatakai ia au Le agaveli o olatou laugutu !

¹¹ Ke laku kia latou ni malala kaka ! Ke ti latou ki le afi, Ki vanu, ala e leaise mafai ke lotou toe tuu ake i ai !

¹² Ko le tagata leia e gutu loiloi e leaise makeke i le malama nei ; Ti ko le tagata agamakeke, e maumaui a ia e le malaia.

¹³ E kau iloa e faitotonu le Eteleno ki leia e mamae, E agatonu a ia ki le kau mativa.

¹⁴ Io, e sua loa le kau maokioki ki lou suafa, E nofo loa le kau agatonu i ou mua.