Pesalemo 139 - Tosi Tapu

Poto lee gato o le Atua

¹ Ki le pule o le kau sua. A Tavite. Pesalemo. Eteleno, e ke tilo au, ti e ke iloa au !

² E ke iloa mo ka kau tonatona ki lalo, ti mo ka kau tuu ki aluga, E ke ului mei mamao laku manatu ;

³ E ke iloa mo ka kau saele, ti mo ka kau moe, Ti e ke ulu ki oku ala fuli !

⁴ Talie e leikiaise kaku le masau ki loku alelo, Kae kua ke iloa katoa a ia, ei Eteleno !

⁵ E ke takatakai au i muli mo mua, Ti e ke teki lou lima kiate au.

⁶ Ko se poto lasi fenaaki e leaise kau kaku ki ai ; E taualuga veli ai a ia ke kau matala ki ai.

⁷ Pe kau ano loa kifea o mamao i lou laumalie, Ti e kau sola loa kifea o mamao i ou mata ?

⁸ Kapau e kau pale ki atu lagi, e ke nofo i ai ; Kapau e kau moe i le nofoaga o le kau mate, ko lena koe i ai.

⁹ Kapau e kau too a kapakau o le mafoata, Ti ke kau ano o nofo i le potupotu o le tai,

¹⁰ I ai foki e taki loa au e lou lima, Ti e too loa au e lou lima atamai.

¹¹ Kapau e kau pati : E lagi kofu loa au e le fakapouli, E liliu le pouli o malama i oku tafatafa.

¹² Ko le pouli foki e leaise fakapouli kiate koe, E gigila le pouli ofaipe le ao, Ti mo le fakapouli ofaipe le malama.

¹³ Ko koe leia na fau ia oku ifiifi, Leia na fau ia au i le manava o loku tinana.

¹⁴ E kau fakafetai kiate koe i lau gaoi loku tino o fulumalie ai. E fulumalie ai au gaoiaga, Ti e iloa a ia e loku laumalie.

¹⁵ Na leaise munia fua se koga o loku tino iate koe, I le temi leia na ke fau ai au i se ganea fakapulipuli, Ti na ke teuteu ai au ke fulumalie i le manava o loku tinana.

¹⁶ I le temi leia na kau nofo ai ko se fa nea noa, na tio ou mata kiate au ; Kae i lau tosi na tosi ai A aso fuli ala na fakatuutuu kiate au, kae e leikiaise sa se aso fua e tasi o latou.

¹⁷ Ei Atua, e leaise mafai kau matala ki au fakakaukau, E lotou lasi ai !

¹⁸ Kapau e kau lau latou, e lotou lasi ake i fitii one. E kau ala ake, e kau nofo aifai mo koe.

¹⁹ Ei Atua, e maoki e ke tamate le tagata agaveli ! Tagata o le toto, kotou fakamamao atu iate au !

²⁰ E lotou masau veli kiate koe, E lotou too lou suafa i le loi, latou ala e fili kiate koe !

²¹ Eteleno, pe leaise kau vesia loa kia latou ala e vesia kiate koe ? Pe leaise kau fakalialia loa kia latou ala e agatuu kiate koe ?

²² E kau vesia kia latou ki se vesia e totonu ; E kau lau latou i oku fili.

²³ Ke ke tilo au, ei Atua, ti ke ke iloa loku loto ! Ke ke asiasii au, ti ke ke iloa aku manatu !

²⁴ Ke ke tio pe kau nofo i se ala veli, Ti ke ke taki au i le ala o le mauli lee gato !