Pesalemo 138 - Tosi Tapu

Fakafetai o uiga mo le fakasoko o fakapapau

¹ A Tavite. E kau fakamalo kiate koe i loku loto katoa, E kau sua ou fakafetai i mua o le Atua.

² E kau punou i lou fale tapu maokioki, Ti e kau fakamalo ki lou suafa, o tupu ko lou agamalie mo lou agatonu, Talie kua lasi lou logologona i le fakasoko o au fakapapau.

³ I le aso leia na kau kalaga ai kiate koe, Na ke tali mai kiate au, na ke fakafimalie au, na ke fakamakeke loku laumalie.

⁴ E fakafetai loa a sau fuli o le malama nei kiate koe ! Mo ka lotou logo loa ki folafola o lou gutu.

⁵ E lotou sua loa a ala o le Eteleno, Talie e lasi le kololia o le Eteleno.

⁶ E taualuga le Eteleno : e tio a ia ki le kau agamalu, Ti e iloa e ia mei mamao le kau fia taualuga.

⁷ Kapau e kau saele i loto malie o le mamae, e ke toe soli mai kiate au le mauli, E ke falo lou lima ki le itaita o oku fili, Ti e fakamauli au e lou lima atamai.

⁸ E gaoi loa le Eteleno kiate au. Eteleno, e lee gato lou agamalie, Aua na ke tiaki a gaoiaga o ou lima !