Pesalemo 137 - Tosi Tapu

Mamae o le kau popula

¹ I kauvai o vaitafe o Papilone, Na motou tonatona ki lalo, ti na motou fetagisi, O motou manamanatu ki Sione.

² Ki sole o le fenua Na motou tautau amatou alepe.

³ I lena, na kole mai e latou ala na pule kia matou ni sua, Ti mo latou ala na fakaveliveli kia matou le fiafia : Kotou sua mai kia matou ni katiko o Sione !

⁴ Pe feaki ke motou sua ia loa ni katiko o le Eteleno I se kele matapule ?

⁵ Kapau e kau galoi a koe, Selusalemi, Ke galoi au e loku lima atamai !

⁶ Ke pipiki loku alelo ki loku kaugutu, Mo kapau e leaise kau manatu kiate koe, Mo kapau e leaise kau fai ki Selusalemi Le tupuaga tafito o loku fiafia !

⁷ Eteleno, manatui fanau o Etome, Ala, i le aso o Selusalemi : Na pati : Kotou tele, kotou tele O kaku ki ona fakatafito !

⁸ Taine o Papilone, leia na maumau, Manuia leia e liufaki atu ia kiate koe, Le veli leia na ke fai kia matou !

⁹ Manuia leia e too ia au fanau, Ti e tege ia latou ki le utu ke lalai !