Pesalemo 136 - Tosi Tapu

Manavaalofa lee gato o le Atua

¹ Kotou fakafetai ki le Eteleno, talie e agamalie a ia, Talie e lee gato lona manava alofa !

² Kotou fakafetai ki le Atua o atua, Talie e lee gato lona manava alofa !

³ Kotou fakafetai ki le Aliki o aliki, Talie e lee gato lona manava alofa !

⁴ Ko ia leia toka tasi e fai ia ni nea fakatalatupua, Talie e lee gato lona manava alofa !

⁵ Ko ia leia na gaoi ia le lagi i lona atamai, Talie e lee gato lona manava alofa !

⁶ Ko ia leia na folasi ia le kele i aluga o atu vai, Talie e lee gato lona manava alofa !

⁷ Ko ia leia na fakatupu ia a malama lalasi o le lagi, Talie e lee gato lona manava alofa !

⁸ Le laa ke pule i le aso, Talie e lee gato lona manava alofa !

⁹ Le masina mo fetuu ke pule i le pouli, Talie e lee gato lona manava alofa !

¹⁰ Ko ia leia na tamate ia a uluaki tupu o le kau Esipito, Talie e lee gato lona manava alofa !

¹¹ Ko ia leia na fakamavae ia Iselaele ia latou, Talie e lee gato lona manava alofa !

¹² Ki lona lima makeke mo lona lima falo, Talie e lee gato lona manava alofa !

¹³ Ko ia leia na vaelua ia le tai Kula, Talie e lee gato lona manava alofa !

¹⁴ Leia na fakasaele ia Iselaele i loto malie o le tai Kula, Talie e lee gato lona manava alofa !

¹⁵ Ti na laku ia Falaone mo lana solia ki le tai Kula, Talie e lee gato lona manava alofa !

¹⁶ Ko ia leia na taki ia lona kakai i le toafa, Talie e lee gato lona manava alofa !

¹⁷ Ko ia leia na taai ia ni sau lalasi, Talie e lee gato lona manava alofa !

¹⁸ Leia na tamate ia ni sau makeke, Talie e lee gato lona manava alofa !

¹⁹ Sioni, sau o le kau Amole, Talie e lee gato lona manava alofa !

²⁰ Mo Oke, sau o Pasani, Talie e lee gato lona manava alofa !

²¹ Ti na soli ia lolatou fenua ko le tofiga, Talie e lee gato lona manava alofa !

²² Ko le tofiga o Iselaele, lana tagata fakasausau, Talie e lee gato lona manava alofa !

²³ Ko ia leia na manatu loa kia tatou i le temi na tou mamae ai, Talie e lee gato lona manava alofa !

²⁴ Ti na saofaki ia loa tatou i lima o latou na fakaveliveli ia tatou, Talie e lee gato lona manava alofa !

²⁵ Ko ia leia e soli ia le nea kai ki tagata fuli, Talie e lee gato lona manava alofa !

²⁶ Kotou fakafetai ki le Atua o atu lagi, Talie e lee gato lona manava alofa !