Pesalemo 135 - Tosi Tapu

Ko le Atua maoki mo taulaatua

¹ Kotou fakafetai ki le Eteleno ! Kotou fakafetai ki le suafa o le Eteleno, Kotou fakafetai kiate ia, tagata fakasausau a le Eteleno,

² Ala e tutuu i le fale o le Eteleno, I lotoa o le fale o lotatou Atua !

³ Kotou fakafetai ki le Eteleno ! talie e agamalie le Eteleno. Kotou sua ki lona suafa ! talie e loto malie a ia.

⁴ Talie na filifili e le Eteleno kiate ia Sakopo, Iselaele, ke liliu ko lona tofiga.

⁵ E kau iloa e lasi le Eteleno, Ti e taualuga lotatou Aliki i atua fuli.

⁶ Ko nea fuli ala e loto ki ai le Eteleno, e fai e ia latou, I le atu lagi mo le kele, I atu tai ti mo potu loloto fuli.

⁷ E fakapale ake e ia ki aluga a ao i potupotu o le malama nei ; E fakatupu e ia a uila mo le ua ; E too e ia le matagi mei ona koloa fufu.

⁸ Na taai loa e ia a uluaki tupu o Esipito, Mei tagata o kaku ki manu.

⁹ Na kakau loa e ia ni fakamailoga mo ni milakulo kiate koe, Esipito ! Kia Falaone mo ana tagata fakasausau fuli.

¹⁰ Na taai loa e ia ni puleaga mauke, Ti na tamate loa e ia ni sau makeke :

¹¹ Sione, sau o le kau Amole, Mo Oke, sau o Pasani, Ti mo sau fuli o Kanaane ;

¹² Ti na tuku loa e ia lolatou fenua ko se tofiga, Ko se tofiga ki Iselaele, lona kakai.

¹³ Eteleno ! e tuu lou suafa o lee gato ! Eteleno ! e tuu lou suafa i tautupu mo tautupu !

¹⁴ Talie e fakamaau loa e le Eteleno lona kakai, Ti e alofa loa a ia ki ana tagata fakasausau.

¹⁵ Ko taulaatua o atu puleaga ko le siliva mo le aulo Ko gaoiaga latou o lima o le tagata.

¹⁶ E lotou maua se gutu kae e leaise lotou masau fua ; E lotou maua ni mata kae e leaise lotou tio fua ;

¹⁷ E lotou maua ni taliga kae e leaise lotou logo fua ; E leaise lotou maua fua se tukumanava i lolatou gutu.

¹⁸ E lotou tatau mo fakatata, latou ala e fau ia a fakatata, Latou fuli ala e fanaki ki fakatata.

¹⁹ Fale o Iselaele, kotou fakafetai ki le Eteleno ! Fale o Alone, kotou fakafetai ki le Eteleno !

²⁰ Fale o Levi, kotou fakafetai ki le Eteleno ! Kotou ala e i ki le Eteleno, kotou fakafetai ki le Eteleno !

²¹ Mei Sione ke fakafetai ki le Eteleno, Leia e nofo i Selusalemi ! Kotou fakafetai ki le Eteleno !