Pesalemo 132 - Tosi Tapu

Fakamanatu o fakapapau a le Atua kia Tavite

¹ Katiko o le fanoga tapu. Eteleno, ke ke manatui Tavite, Mo ona mamae fuli !

² Na fakapapau loa a ia ki le Eteleno, Na fai loa e ia le fakapapau leinei ki le mafimafi a Sakopo :

³ E leaise kau ulu loa ki le falela leia e kau nofo ai, E leaise kau sopo loa ki le palepale leia e kau malolo ai,

⁴ E leaise kau tuku loa ke fia moe oku mata, Pe ke moe oku laumata,

⁵ O kaku ki laku maua se ganea ki le Eteleno, Se nofoaga ki le mafimafi a Sakopo.

⁶ Ko leinei, na motou logo loa e tuku a ia i Efalata ! Na motou maua loa a ia i faisaga o Saale…

⁷ Tou ano ki lona nofoaga, Tou punou i mua o lona tekitekiaga vae !…

⁸ Tuu ki aluga, Eteleno, au ki lou maloloaga, A koe mo le aleka o lou agai !

⁹ Ke kofu au tagata faisakilifisio ki le maokioki, Ti ke kalaga fakafiafia lau kau agatonu !

¹⁰ O tupu ko Tavite, lau tagata fakasausau, Aua na ke tekei kese lau filifiliia !

¹¹ Na fakapapau le Eteleno kia Tavite i le maoki, E leaise toe liliu loa a ia ki muli : E kau fakaeke loa i lou ekeekeaga fakasau se fua o lou manava.

¹² Kapau e tausi e ou vosa laku sai Ti mo aku pelesepeto ala e kau ako kia latou, Ko olatou vosa foki o lee gato E toe eke loa i lou ekeekeaga fakasau.

¹³ Io, na filifili e le Eteleno a Sione, Na oli a ia ke liliu a ia ko lona nofoaga :

¹⁴ Ko loku maloloaga a ia o lee gato ; E kau nofo loa i ai, talie na kau oli ki ai.

¹⁵ E kau tapuaki loa ki lana nea kai, E kau fagai loa ki le pane lona kau mativa o makona ;

¹⁶ E kau fakakofu loa ki le fakamauli lana kau faisakilifisio, Ti e kalaga fakafiafia loa lana kau agatonu.

¹⁷ I Sione, e kau lagai loa ki aluga le mafimafi o Tavite, E kau teuteui loa se fa malama ki loku filifiliia,

¹⁸ E kau fakakofu loa ki le luma ona fili, Kae gigila loa lona pala i lona lae.