Pesalemo 130 - Tosi Tapu

Talitali ki le tokoi a le Atua

¹ Katiko o le fanoga tapu. Mei le takele o le moana, e kau kalaga kiate koe, ei Eteleno !

² Aliki, fakalogo mai ki loku leo ! Ke tokaga ou taliga Ki le leo o laku tagi !

³ Ka na ke taupau le manatu ki agasala, Eteleno, Ko ai e mafai loa ke mauli ?

⁴ Kae e maua le fakamolemole i ou tafa, O tupu ke i kiate koe.

⁵ E kau amanaki malie ki le Eteleno, e amanaki malie loku laumalie, Ti e kau talitali ki lana fakapapau.

⁶ E talitali loku laumalie ki le Aliki, O lasi ake i le talitali a tagata leo ki le usu, Io, o lasi ake i le talitali a tagata leo ki le usu.

⁷ Iselaele, tuku lau amanaki malie ki le Eteleno ! Talie e maua le manava alofa i tafa o le Eteleno, Ti e maua foki le totogi i ona tafa.

⁸ Ko ia leia e totogi ia loa Iselaele I ana agaveli fuli.