Pesalemo 119 - Tosi Tapu

¹ Manuia latou ala e saosaoa i lolatou ala Ala e saele o mulimuli ki le lao a le Eteleno !

² Manuia latou ala e tausi ia ana pelesepeto, Ala e afa ia a ia i lolatou loto katoa,

³ Ala e leaise fai ia le agaveli, Kae saele i ona ala !

⁴ Na ke tuku au fakatotonu, Ke tokaga o tausi latou.

⁵ Ke amusia ake ke sako oku ala, O tupu ke kau tausi au lekula !

⁶ Ti e leaise kau luma loa, I le tio ki au folafola fuli.

⁷ E kau fakafetai loa kiate koe i le maoki o loku loto, O ako a lao o lou faitotonu.

⁸ E kau fia tausi lekula : Aua na ke tiaki oki au.

PETA

⁹ E fakamea feaki loa e le tupulaga lona ala ? I lana tuku ke taki a ia e lau folafola.

¹⁰ E kau afa a koe i loku loto katoa : Aua na ke tuku au ke sese o mamao i au folafola !

¹¹ E kau kukumi lau folafola i loku loto, O tupu ke aua na kau agasala kiate koe.

¹² Ei Eteleno, e kau fakafetai ki lou suafa ! Ako mai kiate au au lekula !

¹³ I oku laugutu e kau lau A fakamaau fuli o lou gutu.

¹⁴ E kau fiafia i le mulimuli ki au pelesepeto, O sakinake kua kau maua a koloa fuli.

¹⁵ E kau metitasio ki au fakatotonu, E kau maua ou ala i oku mua.

¹⁶ E kau maua oku fiafia i au lekula, E leaise kau galoi fua lau folafola.

KIMELA

¹⁷ Fakasa lou agamalie ki lau tagata fakasausau, o tupu ke kau mauli Ti ke kau tausi lau folafola !

¹⁸ Fakamavaa oku mata, o tupu ke kau tio Ki nea fulumalilie o lau lao !

¹⁹ Ko au ko se matapule i le malama nei : Aua na ke fufu mai kiate au au folafola !

²⁰ Kua fatii loku laumalie, O tupu ko lana oli tuumau ki au lao.

²¹ E ke valoki le kau fia nealasi, le kau malaia lena, Ala na sese o mamao i au folafola.

²² Too atu iate au le luma mo le vesiaina ! Talie e kau tausi au pelesepeto.

²³ Na tonatona foki ni aliki o masau veli kiate au, Kae e metitasio lau tagata fakasausau ki au lekula.

²⁴ Ko au pelesepeto ko oku fiafiaaga, Ko oku tagata tokoi latou.

TELETA

²⁵ E pipiki loku laumalie ki le efu : Toe tuku mai kiate au le mauli o mulimuli ki lau folafola !

²⁶ E kau fakamatala oku ala, ti e ke tali mai kiate au : Ako mai kiate au lekula !

²⁷ Tuku ke kau matala ki le uiga o au fakatotonu, Ti e kau metitasio loa ki au nea malilie !

²⁸ E tagi loku laumalie i le mamae : Toe lagai au ki aluga o mulimuli ki lau folafola !

²⁹ Fakamamao iate au le ala o le loi, Tuku mai kiate au le kalasia ke kau mulimuli ki lau lao !

³⁰ E kau filifili le lao o le maoki, E kau fakatuu au lao i oku mua.

³¹ E kau pipiki ki au pelesepeto : Eteleno, aua na ke tuku ke kau luma !

³² E kau makape i le ala o au lao, Talie e ke fakalaulasi loku loto.

SE

³³ Eteleno, ako mai kiate au le ala o au lekula, O tupu ke kau taofi a ia o kaku ki le fakaoki !

³⁴ Soli mai kiate au le atamai, o tupu ke kau tausi lau lao, Ti ke kau fai a ia i loku loto katoa !

³⁵ Taki au i le ala o au fakatotonu, Talie e kau alofa ki ai.

³⁶ Taofi loku loto ki au pelesepeto, Kae aua ki koloa !

³⁷ Fulusi oku mata ke aua na tio ki nea vaiga ! Tuku ke kau mauli i lou ala !

³⁸ Fai ki lau tagata fakasausau lau fakapapau, Leia na ke tuku kia latou ala e i kiate koe !

³⁹ Fakamamao iate au le luma leia e kau i ki ia ! Talie e apele au fakamaau i le agamalie.

⁴⁰ Ko leinei, e kau fia fai au fakatotonu : Tuku ke kau mauli i lou faitotonu !

VAU

⁴¹ Eteleno, ke au lou manava alofa kiate au. Fakamauli au o mulimuli ki lau fakapapau !

⁴² Ti e mafai loa ke kau tali ki leia e lauveli mai kiate au, Talie e kau fanaki ki lau folafola.

⁴³ Aua na ke too oki i loku gutu le folafola o le maoki ! Talie e kau fanaki ki au fakamaau.

⁴⁴ E kau tausi loa lau lao o tuumau, I temi fuli, o lee gato.

⁴⁵ E kau saele loa i le lau lasiga, Talie e kau afa au fakatotonu.

⁴⁶ E kau masau loa ki au pelesepeto i mua o sau, Ti e leaise kau luma loa.

⁴⁷ E kau fai ki au folafola oku fiafiaaga, Talie kau alofa kia latou.

⁴⁸ E kau siki oku lima ki au folafola, ala e kau alofa ki ai. Ti e kau fia metitasio au lekula.

SAINE

⁴⁹ Manatui lau fakapapau ki lau tagata fakasausau, O tupu na ke soli mai kiate au le amanaki malie !

⁵⁰ Ko loku fakapelepeleaga a ia i loku mamae, Talie na ke toe soli mai kiate au le mauli o mulimuli ki lau fakapapau.

⁵¹ Na nukinuki kiate au ni tagata fia nealasi ; E leaise kau mavae fua i lau lao.

⁵² Ei Eteleno, e kau manatui au fakamaau i mua ! Ti e kau fimalie.

⁵³ E kau maua e se itaita veli i le tio ki le kau agaveli, Ala e tiaki ia lau lao.

⁵⁴ Ko au fakatuutuu ko le tupuaga o aku katiko, I le fale leia e kau matapule ai.

⁵⁵ Ei Eteleno, e kau manatui lou suafa i le pouli, Ti e kau tausi lau lao.

⁵⁶ Ko le tausi o au fakatotonu Ko lena loku koloa maoki.

KETA

⁵⁷ Ko loku vaega, ei Eteleno, e kau fakasa : Ko le tausi o au folafola.

⁵⁸ E kau kalaga kiate koe i loku loto katoa : Alofa mai kiate au, o mulimuli ki lau fakapapau !

⁵⁹ E kau fakakaukau ki oku ala, Ti e kau taki oku vae ki au pelesepeto.

⁶⁰ E kau fakavilivili, e leaise kau toe talitali O fai au fakatotonu.

⁶¹ E takatakai au e masele a le kau agaveli ; E leaise kau galoi fua lau lao.

⁶² I loto malie o le pouli e kau tuu ki aluga o fakafetai kiate koe, O tupu ko fakamaauaga o lou faitotonu.

⁶³ Ko le kaukaunea au o latou fuli ala e i kiate koe, Ti mo latou ala e tausi ia au fakatotonu.

⁶⁴ Ei Eteleno, e apele le malama nei i lou agamalie ; Ako mai kiate au lou finegalo !

TETA

⁶⁵ E ke fai se nea malie ki lau tagata fakasausau, Ei Eteleno ! o mulimuli ki lau fakapapau.

⁶⁶ Ako mai kiate au le poto mo le atamai, Talie e kau tui ki au folafola.

⁶⁷ I mua o loku fakamamaei, na kau sese ; I le aso nei e kau fai lau folafola.

⁶⁸ E ke agamalie ti e ke fai nea malie ; Ako mai kiate au au fakatuutuu !

⁶⁹ E fakakaukaui e ni tagata fia nealasi ni loi kiate au ; Ko au, e kau tausi au fakatotonu i loku loto katoa.

⁷⁰ E logo noa le loto ofaipe le gako ; Ko au, e kau maua oku fiafia i lau lao.

⁷¹ E malie kiate au ke tuku au ki lalo, O tupu ke kau ako au fakatuutuu.

⁷² E malie ake kiate au le lao o lou gutu I ni nea aulo mo paaga e afe.

IOTA

⁷³ Ko ou lima na fakatupu ia au, na lotou fau au ; Soli mai kiate au le atamai, o tupu ke kau ako au folafola !

⁷⁴ Ko latou ala e i kiate koe e tio kiate au ti e lotou fiafia, Talie e kau amanaki malie ki au fakapapau.

⁷⁵ E kau iloa, ei Eteleno ! e totonu au fakamaauaga ; Talie ko lou agatonu leia na ke fakamamae ai au.

⁷⁶ Ke liliu lou agamalie ko loku fakapelepeleaga, Ofaipe le nea na ke fakapapau ki lau tagata fakasausau !

⁷⁷ Ke au ou manava alofa kiate au, o tupu ke kau mauli ! Talie ko lau lao e fai ia oku fiafiaaga.

⁷⁸ Ke lotou laulaunoa, le kau fia nealasi, leia e fakaveliveli mai kiate au kae sona tupuaga ! Ko au, e kau metitasio ki au fakatotonu.

⁷⁹ Ke lotou toe liliu mai kiate au, latou ala e i kiate koe, Ti mo latou ala e iloa ia au pelesepeto !

⁸⁰ Ke maoki loku loto i le fai o au fakatuutuu, O tupu ke aua na kau apele i le luma !

KAFA

⁸¹ E oli mamae loku laumalie ki lou fakamauli ; E kau amanaki malie ki lau fakapapau.

⁸² E oli mamae oku mata ki lau fakapapau ; E kau pati : Ko afea e ke fakapelepele ai loa au ?

⁸³ Talie e kau faipe se utele i le afu ; E leaise galo fua au fakatuutuu iate au.

⁸⁴ E fia le lasi o aso o lau tagata fakasausau ? Ko afea e ke fakamaau ai loa latou ala e fakaveliveli mai kiate au ?

⁸⁵ E kenu e ni tagata fia nealasi ni popoko i oku mua ; E leaise lotou fai fua se nea o mulimuli ki lau lao.

⁸⁶ E apele au folafola fuli i le agatonu ; E lotou fakaveliveli noa kiate au : Tokoi mai kiate au !

⁸⁷ Na teiteiki ke lotou tamate au, o kau puli oki ; Kae ko au, e leaise kau tiaki fua au fakatotonu.

⁸⁸ Toe soli mai kiate au le mauli o mulimuli ki lou agamalie, O tupu ke kau tausi a pelesepeto o lou gutu !

LAMETA

⁸⁹ Ei Eteleno, e tuu lau folafola i le lagi, o lee gato.

⁹⁰ E tuu lou agatonu i tautupu ki tautupu ; Na ke fakatafito ia le kele, ti e tuu makeke a ia.

⁹¹ Ko au lao ala e tuu ai nea fuli i le temi nei, Talie e fakalogo nea fuli kiate koe.

⁹² Ka na leaise kau maua oku fiafia i au lao, Na kau mate loa i loku mamae.

⁹³ E leaise toe galo loa iate au i se aso au fakatotonu, Talie ko latou ala e ke toe soli mai ai loku mauli.

⁹⁴ Ko au a au : fakamauli au ! Talie e kau afa au fakatotonu.

⁹⁵ E talitali mai kiate au ni tagata agaveli ke lotou tamate au ; E kau tokaga ki au pelesepeto.

⁹⁶ E kau tio ki ni gatoaga o nea fuli e saosaoa : Kae ko au folafola, e leai solatou gatoaga.

MEMA

⁹⁷ E kau alofa ai ki lau lao ! E kau metitasio ki ai i le aso katoa.

⁹⁸ E fakaliliu au e au folafola o poto ake i oku fili, Talie e kau too tuumau latou iate au.

⁹⁹ E kau poto ake i oku pule fuli, Talie e kau metitasio au pelesepeto.

¹⁰⁰ E lasi ake loku atamai i leia o le kau matua, Talie e kau tausi au fakatotonu.

¹⁰¹ E kau taofi loku vae ke mamao i ala veveli fuli, O tupu ke kau tausi lau folafola.

¹⁰² E leaise kau mamao i au lao, Talie ko koe leia e ako ia au.

¹⁰³ E suamalie au folafola ki oku kau gutu, O lasi ake i le meli ki le gutu !

¹⁰⁴ E kau liliu o atamai i au fakatotonu, Koia e kau vesia ai ki ala fuli o le loi.

NUNA

¹⁰⁵ Ko lau folafola ko se malama taki i oku vae, Ti ko se malama i loku ala.

¹⁰⁶ E kau fakapapau, ti e kau fai loa a ia, Ke kau tausi a lao o lou faitotonu.

¹⁰⁷ E kau mamae lasi ai : Eteleno, toe tuku mai kiate au le mauli, o mulimuli ki lau folafola !

¹⁰⁸ Ke ke tali, ei Eteleno ! a manatu loto e fakasa e loku gutu, Ti ke ke ako mai kiate au au lao !

¹⁰⁹ E teiteiki tuumau loku mauli, Kae leaise galo fua lau lao iate au.

¹¹⁰ E fakatuu e ni tagata agaveli ni masele kiate au, Kae e leaise kau tiaki fua au fakatotonu.

¹¹¹ Kua liliu au pelesepeto ko loku tofiga o lee gato, Talie ko le fiafiaaga latou o loku loto.

¹¹² E kau peluki loku loto o fai lou finegalo, I aso fuli, o kaku ki le gatoaga.

SAMEKA

¹¹³ E kau vesia ki tagata lotolotolua, Kae kau alofa ki lau lao.

¹¹⁴ Ko koe ko loku mumuniaga mo loku paletau ; E kau amanaki malie ki lau fakapapau.

¹¹⁵ Kotou fakamamao atu iate au, kau agaveli, O tupu ke kau tausi a folafola o loku Atua !

¹¹⁶ Tokoi au o mulimuli ki lau fakapapau, o tupu ke kau mauli, Kae aua na ke tuku ke kau luma i loku amanaki malie !

¹¹⁷ Ke ke liliu ko loku tokoi, o tupu ke kau mauli, Ti ke kau tokaga tuumau ki au fakatuutuu !

¹¹⁸ E ke vesia kia latou fuli ala e fakamamao i au fakatuutuu, Talie e to noa lalatou kaka.

¹¹⁹ E ke ave le kau agasala fuli o le malama nei ofaipe se piau ; Koia e kau alofa ai ki au pelesepeto.

¹²⁰ E lulu loku tino i loku i kiate koe, Ti e kau i ki au fakamaauaga.

AINI

¹²¹ E kau tausi le lao mo le faitotonu : Aua na ke tuku au kia latou ala e fakaveliveli mai kiate au !

¹²² Ke ke liliu ko le fakamaoki o le malie o lau tagata fakasausau ; Aua na ke tuku ke pule ni tagata fia nealasi kiate au !

¹²³ E gaegae oku mata i le talitali ki lou fakamauli, Ti mo le fakapapau o lou faitotonu.

¹²⁴ Fai ki lau tagata fakasausau o mulimuli ki lou agamalie, Ti ke ke ako mai kiate au lou finegalo !

¹²⁵ Ko au ko lau tagata fakasausau : soli mai kiate au le atamai, O tupu ke kau iloa au pelesepeto !

¹²⁶ Ei Eteleno, ko le temi leia ke ke gaoi ai : Talie e lotou maumaui lau lao.

¹²⁷ Koia e kau alofa ai ki au fakatotonu, O lasi ake i le aulo, i le aulo mea.

¹²⁸ Koia e kau pati ai e totonu au fakatotonu fuli ; Ti e kau vesia ai ki ala fuli o le loi.

FE

¹²⁹ E fulumalie ai au pelesepeto : Koia e tausi ai latou e loku laumalie.

¹³⁰ Ko le matala ki au folafola e tuku ia le malama, E tuku e ia le atamai ki le kau agamalu.

¹³¹ E kau fakamavaa loku gutu ti e kau tukumanava Talie e kau fia kai ki au folafola.

¹³² Fulusi mai ou mata kiate au, ti alofa mai kiate au, O mulimuli ki lau agamasani kia latou ala e alofa ki lou suafa !

¹³³ Fakamakeke oku lakaaga ki lau folafola, ti aua na ke tuku ke pule se agasala kiate au !

¹³⁴ Saofaki au i le fakamakeke a tagata, O tupu ke kau tausi au fakatotonu !

¹³⁵ Fakagigila ou mata ki lau tagata fakasausau, Ti ako mai au lekula kiate au !

¹³⁶ E liligi e oku mata ni vaitafe, Talie e leaise tausi fua lau lao.

KATE

¹³⁷ E ke faitotonu, ei Eteleno ! Ti e maoki au fakamaauaga.

¹³⁸ E fakatuu au pelesepeto i le faitotonu Ti mo le agatonu lasi oki.

¹³⁹ E tutu au e loku oli, Talie kua galo au folafola i oku fili.

¹⁴⁰ Kua asiasii katoa lau folafola, Ti e alofa ki ai lau tagata fakasausau.

¹⁴¹ E kau ikiiki mo vesiainai ; Kae e leaise kau galoi fua au fakatotonu.

¹⁴² Ko lau faitotonu ko se faitotonu lee gato, Ti ko lau lao ko le maoki.

¹⁴³ E kau maua e le mamae mo le tuania ; Kae e kau fiafia i au folafola.

¹⁴⁴ Ko au pelesepeto e totonu o lee gato : Soli mai kiate au le atamai, o tupu ke kau mauli !

KOFE

¹⁴⁵ Ei Eteleno, e kau kalaga kiate koe i loku loto katoa : tali mai kiate au, O tupu ke kau tausi au pelesepeto !

¹⁴⁶ E kau tagi kiate koe : saofaki au, O tupu ke kau fai lou finegalo !

¹⁴⁷ E kau muamua i le mafoata ti e kau tagi : E kau amanaki malie ki au fakapapau.

¹⁴⁸ E kau muamua i le pouli ti e kau fakamavaa oku mata, O metitasio ki lau folafola.

¹⁴⁹ Fakalogo mai ki loku leo o mulimuli ki lou agamalie ! Toe soli mai kiate au le mauli o mulimuli ki lau fakamaau !

¹⁵⁰ E lotou fakafeofi mai kiate au latou ala e afa ia le veli : E lotou fakamamao i le lao.

¹⁵¹ Ei Eteleno, e ke ofi mai kiate au ! Ti e maoki au folafola fuli.

¹⁵² Talu mei fualoa e kau iloa au pelesepeto Na ke fakatuu latou ki le lee gato.

LESE

¹⁵³ Tio ki loku mamae, ti ke saofaki au ! Talie e leaise galo fua lau lao iate au.

¹⁵⁴ Puipui au, ti ke totogi au ; Toe soli mai kiate au le mauli o mulimuli ki lau fakapapau !

¹⁵⁵ E mamao le fakamauli i le kau agaveli, Talie e leaise lotou afa lou finegalo.

¹⁵⁶ Ei Eteleno, e lasi ai ou manava alofa ! Toe soli mai kiate au le mauli o mulimuli ki au fakamaau !

¹⁵⁷ E api ai latou ala e fakaveliveli kiate au ti e vesia mai kiate au ; Kae e leaise kau mavae fua i au pelesepeto.

¹⁵⁸ E kau tio ki le kau kaka ti e kau fakalialia, Talie e leaise lotou tausi lau folafola.

¹⁵⁹ Tio e kau alofa ki au fakatotonu : Eteleno, toe soli mai kiate au le mauli o mulimuli ki lou agamalie !

¹⁶⁰ Ko le fakatafito o lau folafola ko le maoki, Ti e lee gato a lao fuli o lou faitotonu.

SINE

¹⁶¹ E fakaveliveli noa au e ni aliki, Kae koi lulu fai loku loto i au folafola.

¹⁶² E kau fiafia i lau folafola, Ofaipe se tasi leia na maua ia se koloa lasi.

¹⁶³ E kau vesia, e kau fakalialia ki le loi ; Kae kau alofa ki lau lao.

¹⁶⁴ Tua fitu i le aso e kau fakafetai kiate koe, O tupu ko lao o lou faitotonu.

¹⁶⁵ E lasi ai le tokamalie kia latou ala e alofa ki lau lao, Ti e leaise soko fua se malaia kia latou.

¹⁶⁶ Ei Eteleno, e kau amanaki malie ki lau fakamauli, Ti e kau tausi au folafola.

¹⁶⁷ E tausi e loku laumalie au pelesepeto, Ti e kau alofa ai kia latou.

¹⁶⁸ E kau tausi au fakatotonu mo au pelesepeto, Talie e tuu oku ala fuli i ou mua.

TAVE

¹⁶⁹ Ei Eteleno, ke kaku atu kiate koe laku tagi ! Soli mai kiate au le atamai, o mulimuli ki lau fakapapau !

¹⁷⁰ Ke kaku atu kiate koe laku tagi ! Saofaki au, o mulimuli ki lau fakapapau !

¹⁷¹ Ke fakasa e oku laugutu lou fakavikiviki ! Talie e ke ako mai kiate au lou finegalo.

¹⁷² Ke sua e loku alelo lau folafola ! Talie e maoki au folafola fuli.

¹⁷³ Ke tokoi mai lou lima kiate au ! Talie na kau filifili au fakatotonu.

¹⁷⁴ Ei Eteleno, e kau oli mamae ki lau fakamauli ! Ti ko lau lao e fai ia oku fiafiaaga.

¹⁷⁵ Ke mauli loku laumalie ti ke fakafetai a ia kiate koe ! Ti ke poupou au e au fakamaauaga !

¹⁷⁶ E kau sese ofaipe se ovi na puli : afa lau tagata fakasausau, Talie e leaise galo fua au folafola iate au.