Pesalemo 118 - Tosi Tapu

Fakafetai ki le Atua o uiga mo lona manava alofa ti mo lona agamalie

¹ Kotou fakafetai ki le Eteleno, talie e agamalie a ia, Talie tologa lona manava alofa o lee gato !

² Ke pati Iselaele : Talie tologa lona manava alofa o lee gato !

³ Ke pati le fale o Alone : Talie e tologa lona manava alofa o lee gato !

⁴ Ke pati latou ala e i ki le Eteleno : Talie e tologa lona manava alofa o lee gato !

⁵ Mei le manava o le mamae na kau fetapa ki le Eteleno : Na tali mai le Eteleno kiate au, ti na tuku e ia au ki le lau lasiga.

⁶ E kau le Eteleno mo au, e leaise kau i ki se nea : Kolea e mafai ke fai mai e tagata kiate au ?

⁷ Ko le Eteleno ko loku tokoi, Ti e kau fiafia i le tio ki oku fili.

⁸ E malie ake le afa o se mumuniaga i le Eteleno I le fanaki ki le tagata ;

⁹ E malie ake le afa o se mumuniaga i le Eteleno I le fanaki ki le kau lalasi.

¹⁰ Na takatakai au e atu puleaga fuli : I le suafa o le Eteleno na kau taisi latou.

¹¹ Na lotou a takatakai au, ti na lotou taotao au : I le suafa o le Eteleno, na kau taisi latou.

¹² Na lotou takatakai au ofaipe ni lago meli : Na lotou mamate loa ofaipe le vela o ni vao sukisuki ; I le suafa o le Eteleno, na kau taisi latou.

¹³ Na tulei au ke kau siga ; Kae na tokoi le Eteleno kiate au.

¹⁴ Ko le Eteleno ko loku makeke mo le tupuaga o aku fakafetai ; Na liliu a ia ko loku fakamauli.

¹⁵ E malaga ni kalaga o le malo mo le fakamauli i falela o le kau agatonu : E fakasa e le lima atamai o le Eteleno lona mafimafi !

¹⁶ E taualuga le lima atamai o le Eteleno ! E fakasa e le lima atamai o le Eteleno lona mafimafi !

¹⁷ E leaise kau mate loa, e kau mauli loa, Ti e kau fakamatala loa gaoi a le Eteleno.

¹⁸ N tautea au e le Eteleno, Kae na leaise tuku e ia au ki le mate.

¹⁹ Kotou fakamavaa mai kiate au a matapa o le faitotonu : E kau ulu loa, e kau fakafetai loa ki le Eteleno.

²⁰ Ko leinei le matapa o le Eteleno E ulu i ai le kau agatonu.

²¹ E kau fakafetai kiate koe, talie na ke tali mai kiate au, Talie kua ke liliu ko loku fakamauli.

²² Ko le fatu leia na tiaki e latou ala na fakatuu ia le fale Kua liliu ko le fatu tafito o le agele.

²³ E au le nea lena mei le Eteleno : Ko se nea fakatalatupua ki otatou mata.

²⁴ Ko leinei le aso leia na fakatuu e le Eteleno : Ke liliu a ia kia tatou ko se tupuaga o le fiafia mo le nekenekea !

²⁵ Ei Eteleno, tuku mai le fakamauli ! Ei Eteleno, soli mai le manuia !

²⁶ Ke tapuaki leia e au i le suafa o le Eteleno ! E motou tapuaki kia koutou o le fale o le Eteleno.

²⁷ E Atua le Eteleno, ti e fakamalama e ia tatou. Kotou sai le vikitima ki ni va, Kotou aumai a ia ki tala o le aletale !

²⁸ Ko koe ko loku Atua, ti e kau fakafetai loa kiate koe ; Loku Atua, e kau sua loa kiate koe.

²⁹ Kotou fakafetai ki le Eteleno, talie e agamalie a ia, Talie e tologa lona manava alofa o lee gato !