Pesalemo 116 - Tosi Tapu

Fakafetai o tupu ko le saofaki

¹ E kau alofa ki le Eteleno, talie e logo a ia Ki loku leo mo aku tagi ;

² Talie na tokaga lona taliga kiate au ; E kau fetapa loa kiate ia i loku mauli katoa.

³ Na takatakai au e sai o le mate, Ti na too au e mamae o le nofoaga o le kau mate ; Na kau nofo i le mativa mo le mamae.

⁴ Kae na kau fetapa loa ki le suafa o le Eteleno : Ei Eteleno, fakamauli loku laumalie !

⁵ E manava alofa le Eteleno mo faitotonu, E apele lotatou Atua i le loto alofa.

⁶ E taupau e le Eteleno latou ala e agamalu : Na kau malaia, ti na fakamauli e ia au.

⁷ Loku laumalie, toe liliu ki lou maloloaga, Talie na fai e le Eteleno kiate koe se nea malie.

⁸ Io, Na ke fakamauli loku laumalie i le mate, Oku mata i loimata, Oku vae i le siga.

⁹ E kau saele loa i mua o le Eteleno, I le kele o le kau mauli.

¹⁰ Na kau fanaki, i laku pati : kua kau malaia ai !

¹¹ Na kau pati i loku mamae : e kaka tagata fuli.

¹² Pe feaki loa ke kau liufaki ki le Eteleno Ana nea malilie fuli kiate au ?

¹³ E kau siki loa le ipu o saofaki, Ti e kau fetapa loa ki le suafa o le Eteleno ;

¹⁴ E kau fai loa aku fakapapau ki le Eteleno, I mua o lona kakai katoa.

¹⁵ E mauiga ai ki mata o le Eteleno Le mate o latou ala e alofa kiate ia.

¹⁶ Ei Eteleno, fakalogo mai kiate au, talie ko au ko lau tagata fakasausau ; Ko au ko lau tagata fakasausau, vosa o lau fafine fakasausau. Na ke tatala oku sai.

¹⁷ E kau momoli loa kiate koe se sakilifisio fakafetai, Ti e kau fetapa loa ki le suafa o le Eteleno ;

¹⁸ E kau fai loa aku fakapapau ki le Eteleno, I mua o lona kakai katoa,

¹⁹ I lotoa o le fale o le Eteleno, I loto malie o ou, Selusalemi ! Kotou fakafetai ki le Eteleno !