Pesalemo 115 - Tosi Tapu

Ke tuku le kololia ki le Atua toka tasi

¹ Aua na tuku kia matou, Eteleno, aua na tuku kia matou, Kae ki lou suafa ke tuku le kololia, O tupu ko lou agamalie, o tupu ko agatonu !

² Kolea e pati ai loa a atu puleaga : Kofea koia lolatou Atua ?

³ E nofo lomatou Atua i le lagi, E fai e ia a nea fuli e finegalo a ia ki ai.

⁴ Ko taulaatua o atu puleaga ko le aulo mo le paaga, Ko gaoiaga latou o le lima o le tagata.

⁵ E lotou maua se gutu kae e leaise lotou masau fua, E lotou maua ni mata kae e leaise lotou tio fua,

⁶ E lotou maua ni olatou taliga kae e leaise lotou logo fua, E lotou maua ni olatou isu kae e leaise lotou sauga fua,

⁷ E lotou maua ni lima kae e leaise lotou fafa fua, Ni vae kae e leaise lotou saele fua. E leaise au fua se ga leo mei olatou fatakia.

⁸ E lotou tatau mo taulaatua, latou ala e fau ia latou Latou fuli ala e fanaki ki taulaatua.

⁹ Iselaele, fanaki ki le Eteleno ! Ko ia ko lolatou tokoi mo lolatou paletau.

¹⁰ Fale o Alone, fanaki ki le Eteleno ! Ko ia ko lolatou tokoi mo lolatou paletau.

¹¹ Koutou ala e i ki le Eteleno, kotou fanaki ki le Eteleno ! Ko ia ko lolatou tokoi mo lolatou paletau.

¹² E manatu le Eteleno kia tatou : e tapuaki loa a ia, E tapuaki loa a ia ki le fale o Iselaele, E tapuaki loa a ia ki le fale o Alone,

¹³ E tapuaki loa a ia kia latou ala e i ki le Eteleno, Liliki mo lalasi ;

¹⁴ E liuliuga loa e le Eteleno ona kalasia kia koutou, Kia koutou mo akoutou fanau.

¹⁵ Ke tapuaki koutou e le Eteleno, Leia na fakatupu ia le lagi mo le kele !

¹⁶ Ko le atu lagi ko le atu lagi a le Eteleno, Kae na soli e ia le kele ki vosa o le tagata.

¹⁷ E leaise ko le kau mate leia e fakavikiviki ki le Eteleno, E leaise ko se tasi fua ia latou ala kua ifo ki le nofoaga o le fakalologo ;

¹⁸ Kae ko tatou, e tou fakafetai loa ki le Eteleno, I le temi nei o lee gato. Kotou fakafetai ki le Eteleno !