Pesalemo 114 - Tosi Tapu

Fakamanatu o saofaki o le temi kua sili

¹ I le mavae a Iselaele i Esipito, I le fakamamao o le fale o Sakopo i se kakai pagani,

² Na liliu loa a Suta ko lona sagatualio, Na liliu loa a Iselaele ko lona puleaga.

³ Na tio loa ki ai le tai, ti na sola loa a ia : Na toe liliu loa le Solotane ki muli ;

⁴ Na soposopo loa a mauga ofaipe ni ovi tagata, Mo mauga liliki ofaipe ni akeno.

⁵ Kolea kua soko kiate koe, ei tai, ke ke sola ai ? Kolea kua ke toe liliu ai ki muli, ei Solotane ?

⁶ Kolea kua kotou soposopo ai ofaipe ni ovi tagata, ei mauga ? Ti mo koutou, mauga liliki, ofaipe ni akeno ?

⁷ Ei malama nei, ke ke lulu i mua o le Aliki, I mua o le Atua o Sakopo,

⁸ Leia e fetogi ia le utu ko se tanakiaga vai, Le utu fefeka ko se matapuna vai.