Pesalemo 113 - Tosi Tapu

Ko le agamalie o le Atua ki le kau mativa

¹ Kotou fakafetai ki le Eteleno ! Tagata fakasausau a le Eteleno, kotou fakafetai ! Kotou fakafetai ki le suafa o le Eteleno !

² Ke tapuaki ki le suafa o le Eteleno, I le temi nei o lee gato !

³ Mei le sopo o le laa ki le galo o le laa, Ke fakavikiviki ki le suafa o le Eteleno !

⁴ E taualuga le Eteleno i atu puleaga fuli, E taualuga lona kololia i le atu lagi.

⁵ Ko ai e tatau mo le Eteleno, lotatou Atua ? E tuu lona nofoaga i aluga ;

⁶ E tio ona mata mei aluga Ki le lagi mo le kele.

⁷ Mei le efu e fakatuu ake e ia le tagata mativa ; Mei le tauga penu e lagai ake e ia le tagata maimoa,

⁸ Ke fakanofo laua mo le kau lalasi, Io, mo le kau lalasi o lona kakai.

⁹ E soli e ia se fale ki le fafine leia e paa, E fakaliliu e ia a ia ko se tinana fiafia i loto malie o ana fanau. Kotou fakafetai ki le Eteleno !