Pesalemo 112 - Tosi Tapu

Ko le fimalie o le tagata faitotonu

¹ Kotou fakafetai ki le Eteleno ! Manuia le tagata leia e i ki le Eteleno, Leia e maua ia se fiafia lasi i ana fakatotonu.

² E makeke loa lona sakoga i le malama nei, E tapuakina loa le tautupu o tagata agatonu.

³ E maua e ia i lona fale le koloa mo le kololia, Ti e tuu lona faitotonu o lee gato.

⁴ E sopo le malama i le fakapouli ki le kau agatonu, Ki leia e manava alofa, mo loto alofa, ti mo faitotonu.

⁵ Manuia le tagata leia e manava alofa ti mo kai solisoli, Leia e fai ia gaoi fuli i le faitotonu !

⁶ Talie e leaise siga a ia i se aso ; E tologa le igoa o le tagata agatonu o lee gato.

⁷ E leaise tuania e ia ni logo veveli ; E makeke lona loto, o fanaki ki le Eteleno.

⁸ Na fakamakeke lona loto ; e leaise maua e ia se i, Kae e fiafia a ia i le tio ki ona fili.

⁹ E fai e ia ni tufa koloa, e soli e ia ki le kau mativa ; E tuu lona faitotonu o lee gato ; E malaga lona ulu i le kololia.

¹⁰ E tio ki ai le tagata agaveli, ti e itaita a ia ; E gugu e ia ona nifo, ti e okioki a ia ; E pupuli noa a oli o le kau agaveli.