Pesalemo 109 - Tosi Tapu

Ko le tutuku o le tagata agaveli

¹ Ki le pule o le kau sua. A Tavite. Pesalemo. Atua o laku fakafetai, aua na ke fakaleemu !

² Talie e lotou fakamaga kiate au se gutu agaveli mo kaka, E lotou masau mai kiate au i se alelo failoi.

³ E lotou takatakai au ki ni masau o le vesia, Ti e lotou tau mai kiate au, kae sona tupuaga.

⁴ Loga ai e kau alofa kia latou, e lotou vesia mai kiate au, Kae ko au e kau ulufaki latou.

⁵ E lotou totogi mai kiate au le veli ki le malie, Ti mo le vesia ki loku alofa.

⁶ Ke ke tuku latou ki le pule a se tagata agaveli, Ti ke tuu Satana i lona fetuu atamai !

⁷ Ka fakamaau loa a ia, ke fakasa e sala a ia, Ti ke liliu lana kole ko se agasala !

⁸ Ke teiki fua ona aso, Ke too e se tasi lona tuulaga !

⁹ Ke liliu ana fanau o sala matua, Ti ke lokonui lona avaga !

¹⁰ Ke taka noa ana fanau i le ala, ti ke lotou kaiisi, Ke lotou afa lalatou pane o mamao i lolatou nofoaga maumau !

¹¹ Ke ave e le tagata tanaki maua ana nea fuli, Ti ke kaia e le kau matapule le fua o lana gaoi !

¹² Ke aua na taupau e se tasi se manava alofa kiate ia, Ti ke aua na alofa se tasi ki ana fanau sala matua !

¹³ Ke tuuti lona sakoga, Ti ke puli lolatou igoa i tautupu ka au !

¹⁴ Ke manatui tuumau e le Eteleno le agaveli o ona tamana, Ti ke aua na soloi le agasala o lona tinana !

¹⁵ Ke la tuu i mua o le Eteleno o lee gato, Ti ke too e ia lolatou fakamanatu i le malama nei,

¹⁶ Talie na leaise manatui e ia ke fai le manava alofa, Talie na fakaveliveli e ia leia e mamae mo leia e mativa, Ti na tamate e ia le tagata leia na fatifati lona loto !

¹⁷ Na alofa a ia ki le fakamalaia : ke to a ia kiate ia ! Na leaise fiafia a ia i le tapuakina : ke mamao a ia iate ia !

¹⁸ Ke tui e ia le malaia ofaipe se kofu, Ke ulu a ia ofaipe se vai ki ona tootooga, Ofaipe se lolo ki ona ivi !

¹⁹ Ke fai a ia kiate ia pe se kofu ke ufiufi ia a ia, Pe se kilii pipi leia e toi e ia o lee gato !

²⁰ Ko lena le totogi o oku fili mei le Eteleno, Ti mo latou ala e masau veli kiate au !

²¹ Kae ko koe, Eteleno, Aliki, gaoi kiate au o tupu ko lou suafa ! Saofaki au o tupu ko le lasi o lou agamalie !

²² E kau mamae mo mativa, Ti e lavea loku loto iate au.

²³ E kau ano ofaipe le malu o le afiafi, Kua kapu au ofaipe le seseivaka.

²⁴ Kua gaegae oku tuli i le sesunio, Ti kua kala loku tino i le pakia.

²⁵ Kua kau fai kia latou pe se nea gologolo ; E lotou tio mai kiate au, ti e lu olatou ulu.

²⁶ Tokoi mai kiate au, Eteleno, loku Atua ! Fakamauli au i lou agamalie !

²⁷ Ti ke lotou iloa ko lou lima, Ti ko koe, Eteleno, leia na fai ia a ia !

²⁸ Kapau e lotou tutuku au, ko koe, e ke tapuaki loa ; Kapau e lotou malaga ki aluga, e lotou luma loa, Ti e fiafia loa lau tagata fakasausau.

²⁹ Ke kofu e oku fili le luma, Ke lotou kofu le luma ofaipe se taupulupulu !

³⁰ E kau fakafetai loa i loku gutu ki le Eteleno, o leo lasi, E kau siki loa a ia i loto malie o le kakai toka api ;

³¹ Talie e tuu a ia i le fetuu atamai o le tagata mativa, O saofaki a ia ia latou ala e fakamaau ia a ia.